युएई, अबुधाबी स्थित बिबिटी रेस्टुरेन्ट, रिदिम फेसिलिटी मेनेज्मेन्ट, ब्लेजिङ स्टार क्लिनिङ एन्ड रियल स्टेट कम्पनीको आयोजनामा मंगलबार नि:शुल्क स्वास्थ्य शिविर सम्पन्न भएको छ ।
अबुधाबीको प्रतिष्ठित अल अहालिया हस्पिटलको प्राविधिक तथा चिकित्सकीय सहयोगमा आयोजित स्वास्थ्य शिविरमा १ सय ४५ जना बिरामीहरुले नि:शुल्क स्वास्थ्य सेवा प्राप्त गरेका थिए ।
अहालिया हस्पिटलमा कार्यरत नेपाली चिकित्सक यासिर श्रेष्ठ र नेपाली नर्स सुजिना श्रेष्ठको प्रत्यक्ष निगरानीमा सम्पन्न उक्त शिविरमा मधुमेह, बिएमआई, रक्तचाप, आँखा लगायत विभिन्न रोगको परीक्षण गरिएको थियो ।
रिदिम फेसिलिटी मेनेज्मेन्टको कार्यालय परिसरमा सम्पन्न उक्त नि:शुल्क स्वास्थ शिविरमा नेपाली श्रमिकहरुको साथमा भारतीय, बंगलादेशी, पाकिस्तानी श्रमिकहरुले स्वास्थ सेवा लिएको बिबिटी रेष्टुरेन्टको तर्फबाट स्वास्थ्य शिविरको समन्वयकर्ता रामप्रसाद ढुंगेलले जानकारी दिएका छन् ।
शिविरमा उपस्थित अधिक सहभागीको स्वास्थ्य अवस्था सामान्य पाइए पनि उच्च रक्तचाप र मधुमेहका बिरामीको संख्या पनि उल्लेख्य रहेको कार्यक्रम हस्पिटलतर्फका संयोजक प्रज्ञा घिमिरे शर्माले जानकारी दिएकी छन् ।
शिविरको सफलताको लागि एनआरएनए युएईका उपाध्यक्ष फडिन्द्र ढकाल, कोषाध्यक्ष सुमन पराजुली, झापाली समाज युएईका महासचिव लोकेस कोइराला, अबुधाबी क्षेत्र अध्यक्ष सुर्यबहादुर खवास उपस्थित भएर स्वास्थ्य परीक्षण गरेका थिए ।
नेपाल पत्रकार महासंघ युएईका सदस्य उमाकान्त पाण्डे, झापाली समाज युएई, अबुधाबी क्षेत्रीय समितिका काशीराम ढकाल, प्रवासी नेपाली मन्च युएईका सुन्दर पाठक तथा तथा अन्तरास्ट्रिय नेपाली समाजका सदस्यहरुको उपस्तिथि रहेको थियो ।
आफ्नो कम्पनी परिसरमै हस्पिटलको टोली आएर अति आवश्यक सेवा नि:शुल्क उपलब्ध गराएकोमा बिबिटी रेस्टुरेन्ट, ब्लेजिङ स्टार कम्पनी, रिदिम फेसिलिटी मेनेज्मेन्ट, रिदिम बिल्डिङ मेटिरियल कम्पनीका प्रवन्ध निर्देशक केशव कार्कीले उपस्थित सबैलाई आभार व्यक्त गरेका थिए ।
शिविर पश्चात् आयोजित रात्रीभोजमा बोल्दै कार्कीले अल अहालिया हस्पिटललाई धन्यवाद प्रकट गर्दै सेवाको प्रशंसा गरेका थिए।
शिविर संचालनमा नेपाल पत्रकार महासंघ युएई शाखा, अन्तरास्ट्रिय नेपाली समाज र झापाली समाज युएईले समेत सहजीकरण गरेका थिए ।
