आजको मौसम: देश भर चिसो बढेकोले सतर्कता अपनाउन आग्रह

काठमाडौं । देशभर आजको मौसममा आंशिक बदली रहने जल तथा मौसम पूर्वानुमान महाशाखाले जनाएको छ । अहिले बिहान पनि देशभर आंशिक बदली रहेको मौसमविद्ले बताएका छन् ।

महाशाखाका अनुसार हाल नेपालमा अरब सागर र आसपासमा रहेको न्यून चापीय प्रणालीको आंशिक प्रभावका कारण मौसम बदली भएको हो ।

आज राति सुदूरपश्चिम, कर्णाली र गण्डकी प्रदेशको पहाडी भू–भागमा सामान्य बदली तथा बाँकी भू–भागमा आंशिक बदली रहने पूर्वानुमान मौसमविद्ले गरेका छन् ।

सुदूरपश्चिम, कर्णाली र गण्डकी प्रदेशका उच्च पहाडी तथा हिमाली भू–भागका केही स्थानमा हल्का हिमपातको पनि सम्भावना रहेको छ ।

देशभर चिसो बढ्ने क्रममा रहेकोले आवश्यक सतर्कता अपनाउन महाशाखाले आग्रह गरेको छ ।