झापामा करेन्ट लागेर जंगली हात्तीको मृत्यु

झापा— झापाको कमल गाउँपालिका ३ स्थित रतुवामाई वृक्षारोपण आयोजनाको जंगलमा करेन्ट लागेर एक जंगली हात्तीको मृत्यु भएको छ।

स्थानीय समयअनुसार रातिको कुनै बेला उक्त हात्तीले जंगलभित्र गाडिएको फलामको बिजुली पोलमा धक्का दिएको बताइएको छ। धक्का दिँदा माथिल्लो लाइनमा सर्ट सर्किट भएर करेन्ट प्रवाह हुँदा हात्तीको सूँढ र एक दाँत जलेको अवस्थामा घटनास्थलमै मृत्यु भएको इलाका वन कार्यालयले जनाएको छ।

घटनास्थल सुरक्षित राखिएको छ भने आवश्यक कानुनी प्रक्रिया अगाडि बढाउनका लागि चुलाचुलीस्थित सव डिभिजन वन कार्यालयबाट प्राविधिक टोली खटिसकेको जिल्ला प्रहरी कार्यालय झापाले जनाएको छ।