माडी नगरपालिकामा शनिबार साँझ भएको सवारी दुर्घटनामा घाइते भएका ३४ वर्षिय सूर्य अधिकारीको उपचारको क्रममा मृत्यु भएको छ ।
बरुवास्थित चिताई खोलाको पुलमा लु २ च २५०८ नम्बरको बालेरोले बागमती प्रदेश ०६–००१ प ४०९३ नम्बरको मोटरसाइकललाई ठक्कर दिँदा घाइते उनको मेडिकल कलेज भरतपुरमा उपचारको क्रममा राती १२ः १८ बजेको समयमा मृत्यु भएको जिल्ला प्रहरी कार्यालय चितवनले जनाएको छ । अधिकारी माडीको सोमेश्वर माध्यमिक विद्यालयमा लेखापाल गर्दै आइरहेका थिए ।
त्यस्तै बेलेरोको ठक्करबाट गम्भिर घाइते भएका ३४ वर्षिय वेग खत्रीको बगौडा अस्पतालमा उपचारको क्रममा शनिबार साँझ नै मृत्यु भएको प्रहरी कार्यालयका डिएसपी एवम् प्रवक्ता विजयराज पण्डितले जानकारी दिए । मृतक खत्रीले सोही विद्यालयमा पढाउँदै आएका थिए ।
मोटरसाइकलमा सवार अर्का शिक्षक भवानी पौडेल भने घाइते भएका छन् । मोटरसाइकलमा तीन जना सवार रहेको प्रहरीले जनाएको छ ।
