काठमाडौं। अख्तियार दुरुपयोग अनुसन्धान आयोगले अदालतमा बयान फेरेको आरोपमा दुई जना साक्षीविरुद्ध भ्रष्टाचारको मुद्दा दायर गरेको छ । आयोगले शुक्रबार पोखराका केशरीप्रसाद तिवारी र उर्मिला पौडेलमाथि बयान फेरेको आरोपमा विशेष अदालतमा मुद्दा दायर गरेको हो ।
रंगेहात घुसको मुद्दामा अदालतमा साक्षीको रूपमा पेस गरिएका उनीहरूले बयान फेरेपछि उनीहरूमाथि पनि अख्तियारले मुद्दा चलाएको आायोगका सहसचिव एवम प्रवक्ता नरहरी घिमिरेले जानकारी दिए ।
उनका अनुसार अख्तियारले गत बैशाखमा पोखरा महानगरपालिकाका दुई इञ्जिनियर सहित ३ जनामाथि घुस लेनदेन गरेको आरोपमा भ्रष्टाचार मुद्दा दायर गरेको थियो । अख्तियारले महानगरको नक्सा शाखामा कार्यरत सब–इञ्जिनियर उषाकिरण रोकाया, इञ्जिनियर शिवप्रसाद बराल र गोदार कन्सल्टेन्सीका सुरज कुँवर विरुद्ध मुद्दा दायर गरेको प्रवक्ता घिमिरेले बताए ।
आयोगको गण्डकी प्रदेश कार्यालय पोखराबाट खटिएको टोलीले रोकाया र कुँवरलाई सेवाग्राहीसँग घुस लिँदै गर्दा चैत २८ गते पक्राउ गरेको थियो भने अनुसन्धानका आधारमा संलग्नता देखिएपछि इन्जिनियर बराल वैशाख ४ गते पक्राउ परेका थिए ।
त्यही घटनामा संलग्न भएपछि अख्तियारले तिवारी र पौडेललाई मुद्दा नचलाई सरकारी साक्षीको रूपमा अदालतमा पेस गरेको थियो । तर विशेष अदालतमा उपस्थित भएका उनीहरूले उल्टो बकपत्र दिएपछि उनीहरूमाथि समेत मुद्दा चलाइएको हो ।
