सुख्खा मौसम शुरु भएसँगै आगलागीबाट भएको क्षतिको विवरण सार्वजनिक हुन थालेको छ । केही दिन अगाडि ताप्लेजुङको एउटा बजार नै आगलागीबाट सखाप हुन पुगेको थियो । मानवीय क्षति नभए पनि ठूलो आर्थिक तथा भौतिक क्षति भएको छ । अहिलेसम्म उक्त बजार पुनस्र्थापित हुन सकेको छैन । पूरा बजार नै सखाप भएकाले तत्काल पुनस्र्थापनाको सम्भावना हुने कुरा पनि भएन । अहिले ताप्लेजुङसँग जोडिएका राजधानी उपत्यका सहित देशविदेशमा रहेकाहरुबाट राहत संकलनको काम भइरहेको छ । सरकारी सहयोगको पहल पनि त्यहाँका जनप्रतिनिधिले गरिरहेका छन् । ताप्लेजुङ जस्तो ठूलो क्षति नभएपनि देशका विभिन्न भूभागमा आगलागीका घटना भइरहेका छन् । सानो मात्रामा भएपनि देशभरका विवरण जोड्ने हो भने निकै ठूलो क्षति आगलागीबाट भएको छ ।
आगलागी वर्षेनि हुने, मावनीय संकट निम्त्याउने घटना हुन् । बसिरहेको बस्ती, उद्योग कलकारखाना देखि वनजंगलमा आगलागीबाट ठूलो क्षति हुने गरेको छ । आगलागीले मानवीय क्षति हुने मात्रै नभएर पर्यावरणलाई पनि नराम्रोगरी असर पार्ने गरेको छ । विशेषगरी ठूलो जंगलमा हुने आगलागीबाट त्यहाँका पारिस्थितिक प्रणाली भत्कने गर्दछ । सँगै, प्रदुषणका कारण मौसममा प्रतिकुल प्रभाव पर्ने गरेको छ । जलवायु परिवर्तनको एक प्रमुख घटना पनि आगलागी नै हो । यसले मानवीय स्रोतमा समेत असर गर्नेगरेको छ । बन्य जीवजन्तुले आगलागीबाट ठूलो क्षति बेहोर्नुपर्छ । जबकी, जीवजन्तुले पनि बाँच्न पाउने प्राकृतिक अधिकार हो ।
यसरी मानवीय, पर्यावरणीय र बन्यजन्तुमाथि ठूलो असर गर्ने आगलागीका घटना वर्षेनि हुने गर्छ । तर, पूर्वकार्यमा भने आवश्यक ध्यान पुगेको देखिदैन । स्थानीय सरकार बनेपछि अन्धाधुन्ध विकासे गतिविधि बढिरहेका बेला पनि आगलागी नियन्त्रण र पर्यावरणबारे उचित ध्यान दिइएको छैन । जस्तो कि अहिले अधिकांश स्थानीय सरकारसँग आफ्नै डोजर छ । तर, आगलागी जस्तो प्रकोप नियन्त्रणमा लिन दमकल कमैको चासोमा पर्ने गरेको छ । राजधानी उपत्यकामै पनि आवश्यक दमकलको अभाव छ भने दूरदराज र मोफसलमा यथोचित व्यवस्था हुने कुरै पनि भएन । यसर्थ, पहिलो त आगलागी हुनै नदिनेतर्फ ध्यान दिनुपर्छ । र, सँगै आगलागी भएपछि कसरी नियन्त्रणमा लिने भने आवश्यक तयारी आवश्यक छ । यसतर्फ सम्बन्धित सरोकारवालाको ध्यान जान जरुरी छ ।
