इलाम । इलाममा रहेको सघीय खानेपानी तथा ढल व्यवस्थापन आयोजनाको कार्यालय स्थानान्तरण गर्न खोजिएको विरोधमा शुक्रबार इलाम स्थित कार्यालयमा तालाबन्दी गरिएको छ।
तालाबन्दीको अगुवाई निर्माण व्यवसायी संघ इलामले गरेको हो भने कार्यक्रममा उद्योग वाणिज्य संघ इलाम, होटल व्यवसायी संघ, विभिन्न सामाजिक संघसंस्थाका प्रतिनिधि तथा सर्वसाधारण नागरिकहरूको उल्लेखनीय उपस्थिति थियो।
उद्योग वाणिज्य संघ इलामका अध्यक्ष कृष्ण पौडेलले आयोजनाको कार्यालय इलाममै आवश्यक रहेको भन्दै अन्यत्र सार्ने प्रयासप्रति कडा आपत्ति जनाउनुभयो। उहाँले भन्नुभयो, “इलामको खानेपानी सुधार तथा ढल व्यवस्थापनमा काम हुँदै गरेको बेला कार्यालय अन्यत्र सार्ने कदम गैरजिम्मेवार र इलाम विरोधी हो।”
उक्त कार्यालयले इलाम नगरसहितका क्षेत्रहरूमा खानेपानी तथा ढलको सुधार योजना कार्यान्वयन गर्दै आएको थियो। हालै कार्यालय अन्यत्र स्थानान्तरण गर्ने तयारी भइरहेको सूचना बाहिरिएपछि इलामबासी आक्रोशित बनेका थिए।
इलामको हितविपरीत कुनै पनि निर्णय नमान्ने र आवश्यकता परे थप कडा आन्दोलन गर्ने चेतावनी कार्यक्रमका संयोजकहरूले दिएका छन्।
स्थानीय बासिन्दा तथा सरोकारवालाहरूले कार्यालय इलाममै कायम राख्न सरकारले तत्काल निर्णय फिर्ता लिनुपर्ने माग गरेका छन्।
