बुद्धशान्ति– एन्फा रेफ्री लोकराज ढुंगानाको सम्झनामा झापाको बुद्धशान्ति गाउँपालिकामा आदर्श युवा क्लबले ‘लोकराज ढुंगाना स्मृति च्यालेञ्ज कप फुटबल प्रतियोगिता–२०८२’ आयोजना गर्ने भएको छ।
क्लबले शुक्रबार पत्रकार सम्मेलन गरी आगामी बैशाख ६ गतेदेखि १३ गतेसम्म सञ्चालन हुने प्रतियोगितामा झापाका सात र इलामको एक गरी जम्मा आठ टिम सहभागी हुने जनाएको छ। क्लबका अध्यक्ष मात्रिका श्रेष्ठका अनुसार सहभागी टिमहरूमा आयोजक आदर्श युवा क्लबसहित धुर्वतारा स्पोटिङ क्लब, सतासी स्पोटिङ क्लब, शनिश्चरे फुटबल क्लब, न्यू स्टार फुटबल क्लब, धुलाबारी फुटबल क्लब, राजगढ फुटबल क्लब र इलामको जिर्मले फुटबल क्लब रहेका छन्।
प्रतियोगिता बुद्ध आदर्श माध्यमिक विद्यालयको खेलमैदानमा हुनेछ। विजेता टिमले नगद ७० हजार रुपैयाँ, ट्रफी र मेडल प्राप्त गर्नेछ भने उपविजेताले ४० हजार रुपैयाँसहित ट्रफी र मेडल प्राप्त गर्ने क्लबका निवर्तमान अध्यक्ष मनेष दाहालले जानकारी दिए। उनका अनुसार प्रतियोगिता सञ्चालनमा करिब ९ लाख रुपैयाँ खर्च हुने अनुमान गरिएको छ।
क्लबका उपाध्यक्ष दिपक सुब्बा थेवेले प्रत्येक खेलको ‘प्लेयर अफ द म्याच’लाई नगद पुरस्कार दिइने जानकारी दिए। साथै, फाइनल खेलमा उत्कृष्ट पाँच विधामा विशेष पुरस्कार प्रदान गरिनेछ।
पत्रकार सम्मेलनको सञ्चालन क्लबका सचिव दुर्योधन सिंह राजपुत (देव)ले गरेका थिए। उनले खेल निःशुल्क अवलोकन गर्न सकिने जनाउँदै सम्पूर्ण बुद्धशान्तिवासीलाई सहभागिता जनाउन आग्रह गरे।
बिगतमा कोशी प्रदेश फुटबल रेफ्रि संघका सदस्यसमेत रहेका ढुंगानाको गत वर्ष निधन भएको थियो। बुद्धशान्ति तथा स्थानीय खेलकुद विकासमा उनको योगदान उच्च रहेको स्मरण गर्दै क्लबले प्रतियोगिता आयोजना गर्न लागेको जनाएको छ।
