झापा। झापाको कचनकवल गाउँपालिकाले संघीय सरकार समक्ष विभिन्न पूर्वाधार विकास, पर्यटन प्रवर्द्धन, सिमसार संरक्षण, सडक तथा पुल निर्माण, शिक्षा, र खानेपानीसम्बन्धी योजनाहरू समावेश गर्न आग्रह गर्दै औपचारिक प्रस्ताव पेश गरेको छ।
यसै क्रममा, गाउँपालिकाको उच्चस्तरीय प्रतिनिधिमण्डल काठमाडौं पुगेर प्रधानमन्त्रीलाई भेटी योजना प्रस्ताव बुझाएको हो। कोशी प्रदेश सभा सदस्य बसन्त बानियाँको नेतृत्वमा कचनकवल गाउँपालिका उपाध्यक्ष नवराज भट्टराई, युवा संघका नेता तथा अन्य प्रतिनिधिहरू सहभागी टोलीले प्रधानमन्त्री केपी ओली समक्ष प्रत्यक्षरूपमा योजनाहरूको महत्व र आवश्यकताका बारेमा अवगत गराएको पूर्व सांसद बानियाँले जानकारी दिए।
टोलीले पेश गरेको योजनामा स्थानीयस्तरमा पूर्वाधार विकासका लागि आवश्यक पर्ने मुख्य परियोजनाहरू समेटिएका छन्। विशेष गरी, गाउँपालिकाका विभिन्न वडाहरूमा सडक तथा पुल निर्माण, आधुनिक शिक्षासम्बन्धी पूर्वाधार विकास, शुद्ध खानेपानीका लागि दीर्घकालीन योजना, कृषि तथा पर्यटन प्रवर्द्धनका कार्यक्रम, साथै वातावरणीय दृष्टिले संवेदनशील सिमसार क्षेत्रहरूको संरक्षणसम्बन्धी योजनाहरूलाई प्राथमिकता दिइएको छ।
साथै, अत्यन्तै व्यस्तता र संवेदनशील समयमा पनि प्रधानमन्त्रीले महत्वपूर्ण भेटघाटको अवसर प्रदान गरेका थिए। बालुवाटारमा झापा क्षेत्र नं. ३ का महत्वपूर्ण योजनाहरूबारे छलफल गर्दै ती योजनाहरूको औपचारिक हस्तान्तरण गरिएको थियो। छलफलका क्रममा प्रदेशिक अस्पताल भद्रपुर, अधुरो जि.पी. कोईराला स्मृति भवन चन्द्रगढी, अधुरो अरनिको मावि, कचनकवल/भद्रपुरका केही सडक निर्माण, नेपालकै होचो कचनकवल पर्यटकीय क्षेत्र, ऐतिहासिक किच्चकवध क्षेत्रको विकास तथा प्रवर्द्धन, शैक्षिक संस्था सुधार, खानेपानी व्यवस्थापन, तथा कृषि क्षेत्रको विकास लगायतका विषय प्राथमिकताका रूपमा प्रस्तुत गरिएका थिए।
