कचनकवल – कचनकवल गाउँपालिकाका लेखा अधिकृत गोविन्द रिजाललाई आज एक विशेष कार्यक्रमका बीच विदाई तथा “फेरि भेटौंला” भन्दै विदाई गरिएको छ । उनी झापाकै अर्जुनधारा नगरपालिकामा लेखा अधिकृतका रूपमा सरुवा भएका हुन्।
रिजाल २०७८ साल पौष ९ गते कचनकवल गाउँपालिकामा हाजिर भएका थिए र उनले करिब तीन वर्ष तीन महिना सेवा गरेपछि आज २०८१ चैत १० गते आफ्नो कार्यकाल समाप्त गर्दै बिदा भएका हुन्। ताप्लेजुङको पाथीभरा याङ्वरक गाउँपालिकाबाट आएका रिजालले आफ्नो कार्यकालभरि पारदर्शिता, सुशासन, वित्तीय व्यवस्थापन र समन्वयमा महत्वपूर्ण योगदान दिएका थिए।
विदाई कार्यक्रममा गाउँपालिकाका पदाधिकारी, कर्मचारी तथा अन्य सरोकारवालाहरूको उपस्थिति रहेको थियो। कार्यक्रम गाउँपालिका अध्यक्षको अध्यक्षतामा सञ्चालन भएको थियो। गाउँपालिका उपाध्यक्ष नवराज भट्टराई र वडा नं. ६ का वडाध्यक्ष चिन्तामणि खरेलले रिजालको योगदानको प्रशंसा गर्दै आगामी दिनमा अझ उच्च जिम्मेवारी सम्हाल्ने शुभकामना व्यक्त गरे।
त्यस्तै, अन्य वक्ताहरूले पनि रिजालको इमानदारिता, दक्षता र सरल व्यवहारको प्रशंसा गर्दै उनीसँग काम गर्दा प्राप्त भएको अनुभव स्मरण गरे।
गोविन्द रिजालले पनि आफ्नो कार्यकालभरि सहयोग गर्ने सबैलाई धन्यवाद ज्ञापन गर्दै कचनकवलमा बिताएका समयलाई अविस्मरणीय बताउँदै आगामी दिनमा पनि सम्बन्ध कायम रहने विश्वास व्यक्त गरे।
विदाई कार्यक्रम औपचारिक रूपमा सम्पन्न भई उनलाई सम्मानस्वरूप दोसल्ला, कदरपत्र तथा मायाको चिनो प्रदान गर्दै विदाई गरिएको थियो। उपस्थित सबैले उनको उज्ज्वल भविष्यको कामना गर्दै कार्यक्रम समापन गरेका थिए।
