बनियानी। झापाको कचनकवल गाउँपालिकाले संघीय सरकारसमक्ष विभिन्न पूर्वाधार विकास, पर्यटन प्रवर्द्धन, सिमसार संरक्षण, सडक तथा पुल निर्माण, शिक्षा, र खानेपानीसम्बन्धी योजनाहरू समावेश गर्न आग्रह गर्दै प्रस्ताव पेश गर्न गाउँपालिकाको टोली चैत १२ गते राजधानी पुगेको छ।
आज नेकपा एमाले संसदीय दल समितिकी सचेतक सुनिता बरालको नेतृत्वमा कचनकवल गाउँपालिकाका उपाध्यक्ष नवराज भट्टराई, कोशी प्रदेशका पूर्व सांसद बसन्त कुमार बानियाँसहितको टोली अर्थ मन्त्रालय पुगेको हो। टोलीले नेपाल सरकारका उपप्रधान तथा अर्थमन्त्री विष्णुप्रसाद पौडेललाई विभिन्न पूर्वाधार विकाससम्बन्धी प्रस्तावहरू बुझाएको कचनकवल गाउँपालिका उपाध्यक्ष नवराज भट्टराईले जानकारी दिए।

गाउँपालिकाले संघीय सरकारसमक्ष मेची लोकमार्ग कालोपत्रे, सिंधीमारी–कुमालेवस्ती–बालुबाडी बजार सडक कालोपत्रे, अमलखुट्टा पुल निर्माण, जमुना खोला पुल निर्माण, पाठामारी–डुगडुगी–झिडखोला पुल निर्माण, तथा पाठामारी–बनियानी अस्पताल जोड्ने सडक कालोपत्रे जस्ता पूर्वाधार योजनाहरू अघि सारेको छ।
त्यसैगरी, पर्यटन प्रवर्द्धन तथा सिमसार संरक्षण कार्यक्रमहरू समेत प्रस्तावित छन्। टोलीले सम्बन्धित मन्त्रालय र संघीय सरकारका अधिकारीहरूसँग छलफल गरी प्रस्तावलाई अघि बढाउने जनाएको छ।