झापा । झापाको कचनकवल गाउँपालिकाले स्थानीय विपद् व्यवस्थापन समितिहरूसँग छलफल तथा अभिमुखीकरण कार्यक्रम सम्पन्न गरेको छ।
कचनकवल गाउँपालिकाको आयोजना तथा लुथरन विश्व फेडेरेसन, नेपालको आर्थिक सहयोगमा सञ्चालन भएको कार्यक्रममा गाउँपालिका अध्यक्ष कालेन्द्र प्रसाद सिंह राजवंशीको अध्यक्षतामा सम्पन्न भएको हो।
उक्त कार्यक्रममा विपद् जोखिम न्यूनीकरण तथा व्यवस्थापनलाई प्रभावकारी बनाउन आवश्यक नीति, संरचना र व्यावहारिक रणनीतिहरूको विषयमा विस्तृत छलफल गरिएको थियो।
कार्यक्रममा स्थानीय जनप्रतिनिधि, सरोकारवाला निकायका प्रतिनिधिहरू तथा विज्ञहरूको सहभागिता थियो। एसएनजेडीका प्रदेश विपद् व्यवस्थापन विज्ञ रामकुमार दाहाल र यश सुब्बाले विपद् व्यवस्थापनसम्बन्धी प्रशिक्षण प्रदान गरेका थिए।
सुरक्षा निकायका प्रमुख, सामुदायिक वनका प्रतिनिधि, अपाङ्गता भएका व्यक्तिहरूका प्रतिनिधि लगायत सरोकारवाला निकायका सदस्यहरूको समेत उपस्थिति रहेको उक्त कार्यक्रममा नेपालमा विपद् व्यवस्थापनको वर्तमान अवस्था, जलवायु परिवर्तनजन्य जोखिम, तथा तिनको न्यूनीकरणका उपायहरूबारे विस्तृत छलफल भएको थियो।
सहभागीहरूले आफ्ना अनुभव साटासाट गर्दै स्थानीय तहमा लागू गर्न सकिने व्यावहारिक रणनीतिहरू पहिचान गरेका थिए। उनीहरूले जलवायु अनुकूलन क्षमता वृद्धि गर्न प्रविधिको उपयोग, पूर्वसूचना प्रणालीको सुदृढीकरण, विपद् व्यवस्थापन तालिमको प्रभावकारिता वृद्धि, तथा स्थानीय समुदायको सक्रिय सहभागिता आवश्यक रहेकोमा जोड दिएका थिए।
