झापा। नेपालको होचो भूभाग झापाको कचनकवल गाउँपालिकास्थित ५८ मिटर अग्लो कचनकवल स्तम्भदेखि ताप्लेजुङको ३,७९४ मिटर उचाइमा अवस्थित धार्मिक आस्था केन्द्र पाथिभरासम्म एकल साइकल यात्रा गर्ने भएका छन्।
आगामी भदौ १६ गते सोमबार बिहान ५:४५ बजे सुरु हुने यात्रामा मेचीनगरका मिलन राजबंशी सहभागी हुनेछन्। “छोड लागूपदार्थ, जोड साहस, बढ अगाडि निरन्तर” भन्ने नारासहितको अभियानले नेपालको होचो भूभागलाई चिनाउने र युवालाई कुलतबाट टाढा राख्ने सन्देश दिने उद्देश्य राखिएको छ।
साइकल यात्री राजबंशीलाई कचनकवल गाउँपालिकाका अध्यक्ष कलेन्द्र प्रसाद सिंह राजबंशी, उपाध्यक्ष नवराज भट्टराई, वडाध्यक्षहरू तथा भद्रपुर साइकल क्लबका अध्यक्ष जीवनकुमार श्रेष्ठसहितको टोलीले बिदाइ गर्नेछ।
कार्यक्रम संयोजक कर्णबहादुर राजबंशीका अनुसार सो अवसरमा कचनकवलको पहिचान झल्कने सामग्री र विशेष टी-शर्ट प्रदान गरिनेछ।
