झापा। लामो समयदेखि झापा सुरुङ्गामा सुन चाँदीको व्यवसाय गर्दै आएका पाथीभरा देवी ज्वेलरीका सञ्चालक नवराज बिमली (हेमु)ले करिब १ अर्ब भन्दा बढी रकम ठगी गरेर बेपत्ता बनेका छन् ।
सुरुङ्गा बजारमा पाथिभरा सुनचाँदी पसल सञ्चालन गर्दै आएका बिजुलीबाट ठगिनेहरूमा कनकाई नगरपालिकाकी उपमेयर आशा शर्मा शिवाकोटी देखि लिएर कनकाई नगरपालिका ३ का वडाध्यक्ष युवराज चम्लागाईँ सम्म ठगीमा पर्नुभएको छ । जनप्रतिनिधि हुनु भन्दा अगाडिदेखि कारोबार गर्दै आएकोले आफूहरू ठगिएको जनप्रतिनिधिहरूको गुनासो रहेको छ । नवराज बिमली भने गत कार्तिक १० गतेदेखि पसल बन्द गरेर परिवारै बेपत्ता बनेका छन । उनीहरूबाट पीडित हुनेहरूमा हालसम्म ७० हजार रुपैयाँदेखि लिएर १ करोड १३ लाख सम्म ठगिएको बताएका छन् ।
उनीहरु सबैजनाले आफूहरू ठगिएको भन्दै कनकाई नगरपालिका ३ को वडा कार्यालय तथा इलाका प्रहरी कार्यालय बिर्तामोडमा निवेदन दिएका छन । भने आफूहरू ठगिएको भन्दै हेमु बिमली पीडित समिति समेत गठन गरेर आन्दोलन सुरु गरेका छन् । झापा गाउँपालिका वडा नम्बर ६ का पूर्व जनप्रतिनिधि मोहन पोखरेलको संयोजकत्वमा २१ सदस्यीय खोजबिन समिति समेत गठन गरिएको छ ।
हालसम्म आधिकारिक रुपमा २७ करोड रुपैयाँको भने प्रमाणसहित बिमलीबाट ठगिएको भनेर पीडितहरू सम्पर्कमा आएको संयोजक पोखरेलले बताउँनुभयो । यता कनकाई नगरपालिका ३ का वडाध्यक्ष युवराज चम्लागाईँ भने बिमली दशैँलगत्तै सम्पर्क बाहिर रहेकोले उनको खोजबिनका लागि कानुनी उपचार खोजी गर्न थालिएको बताउँनुभयो । यस अघि झापा गौरादहमा समेत अर्का एक सुनचाँदी व्यावसायी सर्वसाधारणको करोडौँ रुपैयाँ ठगी गरेर फरार भएका थिए हाल उनीहरु दम्पती नै झापा जिल्ला कारागारमा रहेका छन्।
ठगीमा पारिनेहरूमा अधिकांशको कानुनी आधार समेत कमजोर भएको बताइएको छ ।
