काठमाडौं । देशभर मनसुनी प्रणालीको सक्रियतासँगै आज दिनभर र राति अधिकांश भागमा बदली मौसम रहने मौसम पूर्वानुमान महाशाखाले जनाएको छ।
महाशाखाका अनुसार, हाल देशभर मनसुनी वायुको प्रभाव सक्रिय रहेको छ। मनसुनको न्यून चापीय रेखा पूर्वतर्फ सरदर स्थानको आसपास र पश्चिमतर्फ सामान्यतः उत्तरतिर रहेको मौसम विज्ञान विभागले जानकारी दिएको छ।
दिउँसो कोशी, मधेश, बागमती, गण्डकी, लुम्बिनी, र सुदूरपश्चिम प्रदेशलगायत देशका पहाडी भू-भागका केही स्थानहरूमा तथा बाँकी प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ।
त्यसैगरी, कोशी, बागमती, गण्डकी, लुम्बिनी र कर्णाली प्रदेशका एक-दुई स्थानहरूमा भारी वर्षा हुन सक्ने अनुमान गरिएको छ। साथै, उच्च-पहाडी र हिमाली भू-भागका केही स्थानहरूमा हल्कादेखि मध्यम वर्षा तथा हिमपातको सम्भावना रहेको मौसमविद्हरूले बताएका छन्।
आज राति पनि देशभर साधारण बदली रहनेछ। कोशी, मधेश, बागमती, गण्डकी र लुम्बिनी प्रदेशका केही स्थानहरूमा मेघगर्जन र चट्याङसहित हल्का देखि मध्यम वर्षा हुने सम्भावना छ भने बाँकी प्रदेशका थोरै स्थानमा पनि वर्षा हुन सक्ने पूर्वानुमान गरिएको छ।
यसका साथै, कोशी र लुम्बिनी प्रदेशका एक–दुई स्थानहरूमा भारी वर्षाको जोखिम रहेको महाशाखाले चेतावनी दिएको छ। उच्च–पहाडी तथा हिमाली भू–भागका थोरै स्थानमा राति पनि हल्का देखि मध्यम वर्षा वा हिमपात हुन सक्ने देखिएको छ।
