जंगली हात्तीको आक्रमणबाट मृत्यु भएका इटहरी वडा नं. २ का रविन खड्काको परिवारलाई इटहरी उपमहानगरपालिकाले एक लाख रुपैयाँ आर्थिक सहयोग भएको छ ।
बुधबार राति हात्तीको आक्रमणबाट मृत्यु भएका २५ वर्षीय खड्काको परिवारलाई सहयोगको घोषणा भएको हो ।
इटहरीका मेयर हेमकर्ण पौडेलले बिहीवार बिहान मृतक खड्काको घर पुगेर क्षतिपूर्ति दिने घोषणा गरेका हुन् ।
इटहरीमा जंगली हात्ती मानव बस्तीमा प्रवेश गरी विध्वंश मच्चाएको तीन महिनाभन्दा बढी भएको भन्दै स्थानीयले हात्ती नियन्त्रण गर्न माग गरेका थिए ।
मेयर पौडेलले तत्काल सुरक्षा निकाय र वन रक्षकसहितको टोली बनाएर बिहीबार रातिदेखि नै रात्रि गस्ती गरिने आश्वासन दिएका छन् ।
हात्तीको समूहले मंगलबार बिहान इटहरी वडा नं. २ कै नैनाकुमारी राईको घर भत्काएर क्षति पुर्याएको थियो ।
दुई महिनाअघि पनि इटहरी वडा नं. २ कै लक्ष्मी राईको घर हात्तीले भत्काएको थियो । भारतको पश्चिमबंगाल हुँदै झापाबाट चारकोसे जंगलमा हात्ती बसेको स्थानीयको भनाइ छ ।
इटहरीमा चारवटा छावासहित २८ वटासम्म हात्ती मानव बस्तीमा पस्ने गरे स्थानीयका भनाइ छ ।
चारकोसे जंल क्षेत्र आसपास हिँडडुल गर्ने हात्तीको सख्या १५० हाराहारीमा रहेको हात्ती विज्ञ अशोक रामले बताए ।
