झापामा सर्पदंशबाट एकजनाको मृत्यु

झापा, साउन २५ । झापाको गौरादह नगरपालिका–४ जोरघरेका ६३ वर्षीय रणबहादुर तामाङको सर्पदंशका कारण मृत्यु भएको छ।

हिजो बिहान करिब १० बजे आफ्नै घरको भान्सा कोठाको सामान सार्ने क्रममा उनलाई सर्पले टोकेको थियो। प्रारम्भिक उपचारका लागि उनलाई नेपाल रेडक्रस सोसाइटी दमकको सर्पदंश उपचार केन्द्रमा लगिएको थियो। सामान्य उपचारपछि थप उपचारका लागि बिर्तामोडस्थित बीएण्डसी अस्पताल पठाइएको थियो।

अस्पतालमा डाक्टरले राति ८ः३० बजे चेकजाँच गर्दा तामाङको मृत्यु भइसकेको पुष्टि भएको प्रहरीले जनाएको छ।

घटनाबारे अनुसन्धानका लागि प्रहरी चौकी महारानीझोडाबाट टोली खटिएको र मृतकको शव अस्पतालमै राखिएको प्रहरीले जनाएको छ।