झापा- सौर्य ऊर्जा उत्पादक कम्पनी झापा इनर्जीले पाँच महिनामा ४ करोड ७० लाख ९३ हजार ४ सय ९७ रुपैयाँको विद्युत नेपाल विद्युत प्राधिकरणलाई बिक्री गरेको छ।
कम्पनी सञ्चालक समितिका अध्यक्ष लालबहादुर सावाँ लिम्बूका अनुसार आर्थिक वर्ष २०८२/८३ को साउनदेखि मंसिर मसान्तसम्मको अवधिमा कम्पनीले ६५ लाख २१ हजार २६० युनिट विद्युत उत्पादन गरेको हो।
शिवसताक्षी नगरपालिका वडा नं ४ बुलुचोकमा झापा इनर्जीको १० मेगावाटको सौर्य विद्युत परियोजना सञ्चालनमा छ। झापा इनर्जीले उत्पादन गरेको विद्युत नेपाल विद्युत प्राधिकरणले प्रतियुनिट ७ रुपैयाँ ३० पैसाका दरले खरिद गर्दछ।
इनर्जीले २०८० साल माघ १० गतेदेखि विद्युतको व्यावसायिक उत्पादन गर्दै आएको छ भने त्यसअघि २०७८ साल मंसिर १२ गते प्राधिकरणले इनर्जीसँग विद्युत खरिद-बिक्रीको सम्झौता (पीपीए) गरेको थियो।
बुलुचोकमा २२ बिघा जग्गा खरिद गरेर इनर्जीले परियोजना निर्माण गरेको छ। परियोजनास्थलमा २१ हजार ६ सयवटा सौर्य प्यानल जडान गरिएका छन्। परियोजनाबाट उत्पादित सौर्य विद्युतलाई एक किलोमिटरको दूरीभित्रै रहेको नेपाल विद्युत प्राधिकरणको बुलुचोक सबस्टेशनमा पुर्याएर राष्ट्रिय प्रसारण लाइनमा जोडिएको छ।
झापा इनर्जीले आर्थिक वर्ष २०८०/८१ मा ५ करोड २८ लाख ८४ हजार ७ सय ७७ रुपैयाँबराबरको सौर्य विद्युत उत्पादन गरी प्राधिकरणलाई बिक्री गरेको थियो। आर्थिक वर्ष २०८१/८२ मा बिक्री बढेर ९ करोड १० लाख ५९ हजार ४ सय ७५ पुगेको अध्यक्ष लिम्बूले जानकारी दिए। रासस
