विराटनगर। कोशी प्रदेश प्रहरी कार्यालय विराटनगरले इलाका प्रहरी कार्यालय धरानका प्रमुख प्रहरी नायब उपरीक्षक (डिएसपी) प्रकाश जबेगुलाई मङ्सिर महिनाको सर्वोत्कृष्ट प्रहरी घोषित गरेको छ ।
प्रहरी नायब उपरीक्षक जबेगुले धनकुटाबाट धरान आउँदै गरेको बा १ झ ५१२७ र बा १ झ ४६०५ नम्बरको सरकारी नम्बर प्लेट लगाइएको दुईवटा गाडीमा लागूऔषध गाँजासहित मङ्सिर १८ गते धरान–१३ अमरहाटमा पक्राउ गरेका थिए ।
चेकजाँच गर्न रोक्दा बा १ झ ५१२७ नम्बरको गाडीका चालकले तीव्र गतिमा सवारी चलाएको हुँदा ४ राउन्ड गोली फायर समेत गरी उक्त गाड८लाई नियन्त्रणमा लिएर दुवै गाडिबाट कुल ६९० केजी गाँजा र चालकलाई पक्राउ गर्न सफल भएका थिए ।
अदालतद्वारा दण्ड सजायको फैसला भएका विभिन्न मुद्दाका ११ जना फरार अभियुक्तहरू मङ्सिर महिनाभित्र पक्राउ गरेका थिए । भन्सार छलेर चोरी पैठारी गरिएको १७ लाख ३२ हजार ४३० रुपैयाँ मूल्यका सामानहरू पक्राउ गरेका थिए ।
डिएसपी जबेगुबाट मङ्सिर महिनामा भएको उक्त कार्यको उच्च मूल्याङ्कन गदै २०८१ साल मङ्सिर महिनाको ‘सर्वोत्कृष्ट प्रहरी’ घोषण गरिएको कोशी प्रदेश प्रहरी कार्यालय विराटनगरले जारी गरेको विज्ञप्तिमा उल्लेख छ ।
डिएसपी जबेगुले धरानमा आपराधिक घटनाको नियन्त्रणमा प्रभावकारी नेतृत्व प्रदान गर्दै आएका छन् । स्थानीय समुदायसँग उनले राम्रो समन्वय गर्दै आएकाले धरानको ठुलो समस्या लागूऔषधको ओसारपोसरलाई नियन्त्रण गर्न सफल भैरहेका छन् ।
प्रदेश प्रहरी कार्यालयले डिएसपी जबेगुको शान्ति सुरक्षा, अपराध नियन्त्रण तथा नागरिकप्रति निर्वाह गर्दै आएका उत्तरदायी भूमिकालाई उत्कृष्ट योगदानको रूपमा लिएको पनि उल्लेख गरेको छ ।
