झापा— कोशी प्रदेशमा आगामी वैशाख १७ र १८ गते आयोजना हुने लगानी सम्मेलनलाई लक्षित गर्दै दक्षिण कोरियाली लगानीकर्ताहरूको एक टोली अध्ययन भ्रमणका क्रममा झापा पुगेको छ। कोरिया नेपाल अन्तर्राष्ट्रिय एक्स्चेन्ज एसोसिएसनको पहलमा आएको टोलीले कोशी प्रदेशका झापासहित विभिन्न जिल्लामा लगानीको सम्भाव्यता अध्ययन गरिरहेको एसोसिएसनकी अध्यक्ष सिर्जना नेपालीले जानकारी दिनुभएको छ।
बुधबार, मेचीनगर नगरपालिकाले उक्त टोलीसँग अन्तरक्रिया कार्यक्रमको आयोजना गर्यो, जसमा नगरप्रमुख गोपालचन्द्र बुढाथोकीले मेचीनगरमा लगानीका सम्भावित क्षेत्रहरूको विस्तृत जानकारी गराए। कोरियन टोलीले काँकरभिट्टा नाका, बसपार्क, एसियन हाइवेको मेची पुल, एनएमसी डेरी उद्योगलगायत महत्वपूर्ण स्थानहरूको अवलोकन गर्दै कृषि, पर्यटन, कागज, रेलमार्गजस्ता क्षेत्रमा लगानी गर्न कोरियाली व्यवसायीहरू इच्छुक रहेको उल्लेख गरेको छ।
मेचीनगर नगरपालिकाका प्रमुख प्रशासकीय अधिकृत अग्निप्रसाद अधिकारीका अनुसार काँकरभिट्टामा बहुतले बहुउद्देश्यीय बसपार्क निर्माण, जैविक जीवाणु प्राङ्गारिक मल कारखाना स्थापनालगायत विभिन्न परियोजनाहरूमा कोरियाली टोलीसँग गहन छलफल भएको थियो। साथै, पर्यटन प्रवर्द्धनका लागि पूर्वाधार निर्माण, कृषि उत्पादन प्रविधिको विकास, प्रविधिमैत्री कृषि प्रणाली तथा दक्ष जनशक्ति उत्पादनजस्ता विषयमा समेत विस्तृत वार्ता भएको छ।
छलफलमा कोरिया नेपाल अन्तर्राष्ट्रिय एक्स्चेन्ज एसोसिएसन नेपालका राष्ट्रिय प्रतिनिधि प्रदीप घिमिरे, उद्योगी मेदनी अधिकारी, युवराज अधिकारीलगायत व्यवसायीहरूले नेपालमा लगानीका लागि पर्याप्त अवसरहरू रहेको बताउँदै सरकारले लगानीमैत्री नीति तथा कार्यक्रमहरू अघि बढाउनुपर्नेमा जोड दिएका थिए।
