काठमाडौं– आज शुक्रवारदेखि देशभरका सिनेमा हलमार्फत प्रदर्शनमा आएको नयाँ नेपाली फिल्म ‘नाङ्गो गाउँ’ ले सुखद सुरुवात गरेको छ ।
आज बिहानैदेखि सिनेमा हलमा यो फिल्म हेर्ने दर्शकको चाप राम्रो देखिएको छ । मल्टिप्लेक्सहरुमा दर्शकको चाप सुखद देखेपछि फिल्मको निर्माण पक्ष उत्साहित देखिएको छ । मध्यान्नपछिका शोहरुमा बुकिङ उच्च देखिएको छ । यसैले यो फिल्मले आज राम्रो ओपनिङ गर्ने संकेत दिएको छ ।
दीपेन्द्र लामाको लेखन तथा निर्देशनमा तयार भएको यो फिल्मलाई दर्शकले पनि राम्रो भनेका छन् । आज बिहान काठमाडौंको एफक्यूब हलमा फिल्म हेर्न पुगेका दर्शकहरुले नाङ्गो गाउँ गज्जबको फिल्म बनेको प्रतिक्रिया दिएका छन् ।
केही दर्शक त यो फिल्मको हिट गीत ‘सुन सुन सुन्दरी’ मा हल भित्रै नृत्य समेत गरिरहेका थिए । फिल्म हेरेर फर्किएका अधिकांश दर्शकले यो फिल्मको कथावस्तु, दिन खोजेको सन्देश मन परेको बताए । कतिपयले फिल्मको क्लाइमेक्सले भावुक बनाएको समेत बताए ।
फिल्म हेरेर फर्किएका दर्शकले गज्जब भनेपछि यसका निर्देशक दीपेन्द्र लामाले खुशी व्यक्त गरे । यो फिल्मले जनतालाई मतदानको विषयमा सचेत गराएको छ । फिल्मले दिन खोजेको सन्देश हरेक मतदाताले बुझ्नु पर्ने फिल्मकर्मीहरुको पनि भनाई छ ।
हिमाल कडरियाको प्रस्तुतिमा तयार भएको यो फिल्ममा जय श्रेष्ठको लगानी छ । फिल्मका कार्यकारी निर्माता रामहरि श्रेष्ठ हुन् । यो फिल्ममा दयाहाङ राई, मिरुना मगर, शिशिर वाङ्देल, साम्राज्ञी राज्यलक्ष्मी शाह, कर्मा, विशाल पहारी, वुद्दि तामाङ, रविन्द्र झा लगायतका कलाकारको अभिनय छ ।
