दाङमा जीप दुर्घटना हुँदा सातजना घाइते भएका छन्। आइतबार साँझ तुलसीपुरबाट सल्यानतर्फ जाँदै गरेको जीप शान्तिनगर( १ हाँडिचारमा दुर्घटना हुँदा सात जना घाइते भएका हुन्।
इलाका प्रहरी कार्यालय तुलसीपुरका प्रहरी निरीक्षक प्रकाश थापाका अनुसार रा १ ज ७७० नम्बरको जीप दुर्घटनामा परेको हो।
दुर्घटनामा सल्यानका त्रिवेणी गाउँपालिका–३ टोट्केका ४६ वर्षीय यमबहादुर केसी, सोही ठाउँका ४५ वर्षीय ऐश्वर्य केसी, ४५ वर्षीया पार्वती केसी र ३४ वर्षीया रेखा ओली घाइते भएका हुन्।
त्यस्तै रुकुम–पश्चिम त्रिवेनी गाउँपालिका–३ निवासी २५ वर्षीया सरिता खड्का, सल्यान त्रिबेणी गाउँपालिका–३ निवासी ३१ वर्षीया रोजिका ओली र लमजुङको मध्यनेपाल नगरपालिका–७ निवासी २४ वर्षीया लिला बाँस्तोला पनि घाइते भएका छन्।
घाइतेमध्ये टोट्के निवासी केसीको अवस्था गम्भीर रहेको प्रहरीले जनाएको छ। उनको टोउको र छातीमा चोट लागेको छ।
घाइतेको राप्ती प्रादेशिक अस्पताल तुलसीपुरमा उपचार भइरहेको छ। जीप आफैँ अनियन्त्रित भई पल्टिएको प्रहरीले जनाएको छ। दुर्घटनापश्चात चालक फरार छन्। रासस
