बिर्तामोड – नेपाल पत्रकार महासंघ कोशी प्रदेशको आयोजना तथा महासंघको झापा शाखाको संयोजनमा भएको ‘पत्रकारिता क्षेत्रको सवलिकरणमा स्थानीय तहको भूमिका’ विषयक कार्यक्रममा स्थानीय तहका प्रमुख, उप–प्रमुख तथा प्रमुख प्रशासकीय अधिकृतहरू सहभागी भएका छन्।
बिर्तामोडमा सम्पन्न उक्त कार्यक्रममा बुद्धशान्ति गाउँपालिकाका अध्यक्ष मनोज प्रसाईले मिडिया र पत्रकारहरू बढी मात्रामा नकारात्मक भएको टिप्पणी गर्नुभयो। उहाँले पत्रकारहरू जनप्रतिनिधिहरूप्रति पूर्वाग्रही भएको भन्दै गुनासो समेत व्यक्त गर्नुभयो।
कार्यक्रममा झापाका १५ वटा स्थानीय तहका प्रतिनिधिहरूको उपस्थिति रहेको थियो। छलफलका क्रममा पत्रकारिताको भूमिका, स्थानीय तहसँगको समन्वय, सकारात्मक समाचारको आवश्यकतासहित विविध विषयमा विचार आदान–प्रदान गरिएको थियो।
नेपाल पत्रकार महासंघ कोशी प्रदेशका पदाधिकारीहरू, स्थानीय पत्रकारहरू तथा जनप्रतिनिधिहरूबीच भएको यो कार्यक्रममा प्रेस स्वतन्त्रता, सूचनाको हक र सञ्चार माध्यमको जिम्मेवारी जस्ता विषयलाई गहन रूपमा उठान गरिएको थियो।
