झापा। रगतलाई कृत्रिम रूपमा निर्माण गर्न वा अन्य माध्यमबाट प्रतिस्थापन गर्न सकिँदैन। जीवन रक्षाका लागि रक्तदान नै एकमात्र उपाय हो। यही उद्देश्यलाई आत्मसात् गर्दै, परमेश्वरको मण्डली विश्व सुसमाचार समाजले आज बिर्तामोडमा ‘निस्तार-चाडको प्रेम, जीवन बचाउने प्रेम’ विश्वव्यापी रक्तदान अभियानको आयोजना गरेको हो।
बिर्तामोड परमेश्वरको मण्डलीमा सम्पन्न रक्तदान कार्यक्रममा मण्डलीका विश्वासीहरू, स्थानीय, परिवारजन गरी करिब २५० जना सहभागी भए। सहभागीहरूले चिकित्सकीय परीक्षण पश्चात रक्तदान गरे।
नेपाल रेडक्रस सोसाइटीले रक्तदानका लागि आवश्यक चिकित्सा सामग्री तथा प्राविधिक सहयोग उपलब्ध गराएको थियो। कार्यक्रममा खानेपानी, सिंचाइँ तथा ऊर्जा मन्त्री एकराज कार्कीले रक्तदानको महत्त्व उजागर गर्दै मण्डलीको प्रयासको प्रशंसा गरे।
बिहान ९ बजे प्रारम्भ भएको कार्यक्रम चार घण्टासम्म सञ्चालन भयो। यस क्रममा कुल ८३ जनाले रक्तदान गरे, जसबाट ४१ हजार ५०० मि.लि. रगत संकलन गरी हस्तान्तरण गरियो। रक्तदानमा सहभागी अमरले “समाजसेवामा योगदान गर्न पाउँदा गर्व लागेको छ” भने। अर्की सहभागी निर्मलाले “रगतको अभाव झेलिरहेका बिरामीहरूलाई सहयोग गर्न पाउँदा खुशी लागेको छ” प्रतिक्रिया दिइन्।
सन् २००५ मा कोरियाबाट प्रारम्भ भएको ‘निस्तार-चाडको प्रेम, जीवन बचाउने प्रेम’ रक्तदान अभियानले विगत २० वर्षमा १,५०० भन्दा बढी स्थानमा रक्तदान कार्यक्रम आयोजना गरिसकेको छ। अहिलेसम्म २,८३,९०० जना सहभागी भइसकेका छन् भने १,२२,१०० जनाले रक्तदान गरिसकेका छन्। १ व्यक्तिको रक्तदानले ३ जनासम्मको जीवन बचाउन सक्ने तथ्यलाई मध्यनजर गर्दै अभियानले हालसम्म करिब ३,६६,४०० जनाको जीवन जोगाएको अनुमान गरिएको छ।
परमेश्वरको मण्डलीले ‘आफ्नो छिमेकीलाई आफूलाई जस्तै प्रेम गर’ भन्ने ख्रीष्टको शिक्षालाई आत्मसात् गर्दै रक्तदान लगायत विभिन्न सामाजिक सेवाका कार्यक्रमहरू निरन्तर आयोजना गरिरहेको छ।
