काठमाडौँ । बिहीबारदेखिको अविरल वर्षासँगै विभिन्न जिल्ला भई बग्ने नदीहरूको जलसतह सतर्कता तह पार गरेको छ । बाढी पूर्वानुमान महाशाखाका अनुसार बाग्लुङ, मकवानपुर, चितवन, तनहुँ र नवलपुरमा बाढीको खतरा रहेको हो ।
बाग्लुङको म्यादी खेला मंगलघाट जलमापन केन्द्रमा जलसतहले सतर्कता तह पार गरेको छ । त्यहाँ जलसतह बढ्दो क्रममा रहेकाले दिउँसो १२ जबेसम्म सतर्कता अपनाउन महाशाखाको अनुरोध छ ।
![Shivam Cement](https://npcdn.ratopati.com/media/promo/855x90_kIzANAGc5P.gif)
यता मकवानपुर जिल्लाको लाल बकैया खोलास्थित जुरेली बजार जलमापन केन्द्रमा सतर्कता तह पारेको र बढ्दो क्रममा रहेको छ । नदी तटीय क्षेत्र र डुबान भइरहने होचा भूभागहरूमा दिउँसो १२ बजेसम्म सतर्कता अपनाउन भनिएको छ ।
यता, चितवन जिल्लाको नारायणी नदी देवघाट जलमापन केन्द्रमा पनि जलसतह सतर्कता तह पार गरेको र बढ्दो क्रममा रहेको छ । चितवन र नवलपरासी जिल्लाको नदी तटीय क्षेत्रमा रहनेले उच्च सतर्कता अपनाउन महाशाखाले भनेको छ ।
![Sidhartha bank](https://npcdn.ratopati.com/media/promo/siddharthabank-desktop_wgGXhR0uuE.gif)
यसैगरी तनहुँ जिल्लाको मर्स्याङ्दी नदी विमलनगर जलमापन केन्द्रमा जलसतह सतर्कता तह पार गरेको र बढ्दो क्रममा रहेकोले सतर्कता अपनाउन भनिएको छ । यस्तै नवलपुरको देउराली नवल वर्षा मापनकेन्द्र र आसपासमा भारी वर्षा मापन भएको छ । सो क्षेत्रमा थप वर्षा हुनसक्ने भएकाले बिनइ नदी लगायत स–साना नदीको बहाव बढ्न सक्ने महाशाखाको भनाई छ । नदी तटीय क्षेत्र र आसपास डुबान हुनसक्ने होचा स्थानमा सतर्कता अपनाउन सूचना जारी गरिएको छ ।