बंगालको खाडीबाट भित्रिएको प्रणालीका कारण देशभर वर्षा र हावाहुरीको सम्भावना

काठमाडौं । बङ्गालको खाडीबाट भित्रिएको जलवाष्पयुक्त हावा र स्थानीय वायूको प्रभावका कारण देशका विभिन्न भागमा वर्षा र हावाहुरीको सम्भावना देखिएको छ।

मौसम पूर्वानुमान महाशाखाका अनुसार हाल देशभर आंशिकदेखि सामान्य बदली रहेको छ भने बागमती प्रदेशका केही स्थानहरू तथा कोशी, गण्डकी र लुम्बिनी प्रदेशका एक-दुई स्थानमा हल्का वर्षा भइरहेको छ।

आज कोशी, मधेस, बागमती र गण्डकी प्रदेशका केही स्थानहरूमा तथा लुम्बिनी र कर्णाली प्रदेशका पहाडी भेगका थोरै स्थानहरूमा मेघगर्जन, चट्याङ्ग र हावाहुरीको सम्भावना रहेको महाशाखाले जनाएको छ।

यस मौसमी प्रणालीले कृषि, दैनिक जनजीवन, सडक तथा हवाई यातायातमा समेत असर पार्न सक्ने भएकाले आवश्यक सतर्कता अपनाउन महाशाखाले सबैलाई आग्रह गरेको छ।