गोलबजार । सिरहामा प्रहरी र बन्दकर्ताबीच झडप भएको छ । झडपमा सिके राउन नेतृत्वको जनमत पार्टीका कार्यकर्ताले आधा दर्जन सवारीसाधन तोडफोड गरेका छन् ।
प्रहरीले किसानलाई पक्राउ गरेको भन्दै जनमत पार्टीका कार्यकर्ताले पूर्वपश्चिम राजमार्ग बन्द गरेर आन्दोलनमा उत्रिएका छन् । सिरहाको औरी गाउँपालिकामा किसानले गाउँपालिकाको कार्यालयबाट तालाफोडेर गहुँको बिउ लिएपछि विवाद चुलिएको हो ।
किसानले बिउ लगेपछि गाउँपालिकाले उजुरीपछि ती किसानलाई प्रहरीले पक्राउ गरेको थियो । उनीहरूलाई प्रहरीले पक्राउ गरेपछि सिके राउत नेतृत्वको जनमत पार्टीले उनीहरूको रिहाइएको माग गर्दै आमहड्तालको घोषणा गरेको हो ।
बन्दकर्ताले बन्दको अवज्ञा गरेको भन्दै गोलबजार र मिर्चैयामा आधा दर्जनभन्दा बढी सवारी साधन तोडफोड गरे । सवारीसाधनमाथि तोडफोड हुन थालेपछि प्रहरीले पनि बल प्रयोग गरेको हो ।
जस कारण दोहोरो झडप भएको प्रत्यक्षदर्शीहरूको भनाइ छ । स्थिति भयावह भएपछि स्थिति नियन्त्रणमा लिन प्रहरीले दर्जनौं सेल अश्रुग्यास प्रहार गरेको जनाइएको छ ।
