बाघको आक्रमणबाट बालकको मृत्यु

धनगढी- बाजुराकाे खप्तड छेडेदहमा बाघको आक्रमणबाट एक बालकको मृत्यु भएको छ।

आइतबार साँझ खप्तड छेडेदह गाउँपालिका- ३ धुर्ताेलाका दिल्लीबहादुर रावतको छोरा अन्दाजी ८ वर्षीय विजय रावतको मृत्यु भएको हो।

जिल्ला प्रहरी कार्यालय बाजुराका प्रहरी निरीक्षक तथा सूचना अधिकारी जनकबहादुर बाेहराका अनुसार घरबाट करिब २ किलोमिटर टाढा रहेको छानोको आगनमा रहेको पानीधारामा बाघले आक्रमण गरेको थियो ।

तत्काल स्थानीयहरुले हाेहल्ला गरेपछि छानोदेखि करिब १५० मिटर टाढा बालकलाई छोडी बाघ भागेको र बालकको घटनास्थलमा नै मृत्यु भएको सूचना अधिकारी बाेहराले बताए ।

साे घटनाकाे जानकारी पछि प्रहरी चाैकी माैरेबाट प्रहरीको टाेलि घटनास्थलमा पुगेको थियो । त्यस्तै मृतक बालकको शव पाेष्टमार्टमका लागि जिल्ला अस्पताल ल्याउने तयारी भएको छ ।