काठमाडौं। काठमाडौं महानगरपालिकाका मेयर बालेन्द्र शाह (बालेन)ले उपप्रधान एवं शहरी विकासमन्त्री प्रकाशमान सिंहमाथि सामाजिक सञ्जालमार्फत आक्रोश व्यक्त गर्दै चेतावनी दिएका छन्।
कांग्रेसका वडा अध्यक्षहरूले कार्यपालिका बैठक बोलाउन निवेदन दिएपछि मेयर शाहले मन्त्री सिंहलाई प्रश्न गर्दै सामाजिक सञ्जालमा लेखेका छन्। उनले अव्यवस्थित बस्ती व्यवस्थापन, कपन खोला सुधार, बालमन्दिर संरक्षण तथा सार्वजनिक सम्पत्तिको सुरक्षा जस्ता विषयमा सरकारको निष्क्रियता देखाउँदै असन्तुष्टि व्यक्त गरेका छन्।
“माननीय शहरी विकासमन्त्री प्रकाशमान सिंहज्यू, अव्यवस्थित बस्ती हटाउने, कपन खोलालाई व्यवस्थित गर्ने, बालमन्दिर बचाउने, सार्वजनिक सम्पत्ति जोगाउने प्रयास गर्ने कुरा सधैं कुरामै रह्यो। कहिले गर्ने हो?” भन्दै बालेनले चेतावनीको शैलीमा भनेका छन्, “मलाई हराउने नाममा आफ्नो शहर, क्षेत्र, र देश चाहिँ नहराउनु होला। यत्रो गणेशमान सिंह, पीएल सिंह र नेपाली कांग्रेसको इतिहास माटोमा नमिसाउनु होला।”
बालेनले आइतबार मात्र कांग्रेसका वडा अध्यक्षहरूले बुझाएको पत्र प्राप्त गरेका थिए।
