झापा — पताल गंगा बचत तथा ऋण सहकारी संस्था लि., बिर्तामोडका तत्कालीन अध्यक्ष रेवती खनाललाई प्रहरीले धनगढीबाट पक्राउ गरेको छ। करोडौं रुपैयाँ हिनामिना गरी फरार रहेका खनाललाई प्रहरीले लामो समयपछि पक्राउ गर्न सफल भएको हो।
इलाका प्रहरी कार्यालय अनारमनीका अनुसार खनाललाई हाल सोही कार्यालयमा राखिएको छ। उनलाई आइतबार जिल्ला अदालत झापामा पेश गरिने तयारी गरिएको प्रहरी नायब उपरीक्षक (डीएसपी) विजय श्रेष्ठले जानकारी दिए। श्रेष्ठका अनुसार खनालले दुई करोड ६ लाख रुपैयाँभन्दा बढी रकम अपचलन गरेको प्रारम्भिक अनुसन्धानबाट खुलेको छ।
उनीविरुद्ध सहकारी सञ्चालक समितिले जिल्ला प्रहरी कार्यालय झापामा उजुरी दर्ता गराएको थियो। उजुरीपश्चात खनाल प्रहरीको निगरानीमा रहे पनि लामो समयसम्म पक्राउ पर्न सकेका थिएनन्।
भद्रपुर–८ स्थायी ठेगाना भई बिर्तामोडमा बसोबास गर्दै आएका खनाल सहकारीको रकम हिनामिना गरी सम्पर्कविहीन भएका थिए। “यो पुरानो मुद्दा हो, अनुसन्धान सम्पन्न भइसकेको छ,” डिएसपी श्रेष्ठले भने, “हामीले उनलाई अदालतमा पेश गर्ने तयारी गरेका छौं। अदालतको आदेशअनुसार आगामी प्रक्रिया अघि बढाइनेछ।”
