बिर्तामोड — बिर्तामोड नगरपालिकाले सडक सुरक्षा सुदृढीकरणका लागि जिल्ला ट्राफिक प्रहरी कार्यालय झापालाई ब्रेथलाईजर र गोप्रो क्यामेरा प्रदान गरेको छ।
शुक्रवार एक कार्यक्रमबीच नगर प्रमुख पवित्रा महतारा प्रसाईले ट्राफिक प्रहरी प्रमुख प्रहरी निरीक्षक गणेश पौडेललाई ब्रेथलाईजर र गोप्रो क्यामेरा एक-एक थान हस्तान्तरण गर्नुभयो।
उपकरण हस्तान्तरणपछि नगर प्रमुख प्रसाईले यस्ता प्रविधिले मद्य सेवन गरी सवारी सञ्चालन गर्ने चालकको पहिचानमा मद्दत पुग्ने बताउनुभयो। उहाँले साना सहयोगबाट पनि दुर्घटना नियन्त्रणमा टेवा पुग्ने विश्वास व्यक्त गर्दै ट्राफिक सुरक्षाका लागि नगरपालिका आगामी दिनहरूमा अझ प्रभावकारी ढंगमा सहकार्य गर्न तयार रहेको जानकारी दिनुभयो।
ट्राफिक प्रहरी कार्यालयसँग हाल आवश्यक उपकरणहरूको अभाव रहेकाले दैनिक कार्य सम्पादनमा कठिनाइ हुने गरेको पाइएको छ। यस पटक करिब दुई लाख रुपैयाँ बराबरको उपकरण सहयोग गरिएको हो।
उक्त कार्यक्रममा प्रमुख प्रशासकीय अधिकृत सागर मिश्र, वडा नं. ७ का अध्यक्ष अविरल कृष्ण खरेल, कार्यपालिका सदस्य निर्मला ल्वागुन गजमेर, वरिष्ठ योजना अधिकृत जय तिम्सिना, शाखा अधिकृत मेघराज वाँस्तोला लगायतको उपस्थिति रहेको थियो।
