क्वालालम्पुर, मलेसिया – गैरआवासीय नेपाली संघ (NRNA) मलेसियाको २०२५–२०२७ कार्यकालका लागि हुन लागेको नवौं महाधिवेशनमा युवा व्यवसायी तथा समाजसेवी रामकृष्ण कार्कीले सचिव पदमा उम्मेदवारी दिने घोषणा गरेका छन्।
झापा जिल्ला, घर–बुद्धशान्ति–३ निवासी कार्की हाल मलेसियामा व्यवसायसँगै विभिन्न सामाजिक कार्यमा संलग्न छन्। उम्मेदवारी घोषणा गर्दै उनले प्रवासी नेपालीहरूको हकहित र सामाजिक हितका लागि संस्थागत रूपमा काम गर्ने उद्देश्यले सचिव पदमा उम्मेदवारी दर्ता गरेको बताए।
मलेसियामा रहेका नेपाली समुदायबीच सक्रिय व्यक्तित्वका रूपमा परिचित कार्कीले विगतमा थुप्रै सामाजिक अभियानमा प्रत्यक्ष तथा अप्रत्यक्ष रूपमा योगदान पुर्याइसकेका छन्। आगामी कार्यकालमा आफ्नो अनुभव, दृष्टिकोण र प्रतिबद्धता सहित अझ प्रभावकारी ढंगले काम गर्ने लक्ष्य लिएको उनले बताएका छन्।
समर्थकहरूले कार्कीलाई सक्षम, ऊर्जाशील र सम्भावनायुक्त उम्मेदवारको रूपमा प्रस्तुत गर्न थालेका छन्। उनी आगामी महाधिवेशनमा सचिव पदका बलियो दाबेदार हुने विश्वास गरिएको छ।
