बुधबारे जेसीजले प्रशान्तलाई जिताउन अभियान नै सञ्चालन गर्ने

बुद्धशान्ति(पालिका सन्देश) । झापा बुद्धशान्ति गाउँपालिका ३ का प्रशान्त पोखरेल नेपालकै चर्चित गायन रियालिटी सो मेरो भोइस युनिभर्स सिजन २ को प्रतिस्पर्धामा छन् । उनी प्रतिस्पर्धामा टप १० मा पर्न सफल भएका छन् । उनले उत्कृष्ट प्रस्तुती दिएर आम दर्शकमाझ प्रिय बनेका छन् ।

कर्णप्रिय आवाजका कारण अडिसनबाट नै चर्चामा रहेका उनी अहिले भोटिङ राउण्डको चरणमा टप १० बाट थप प्रतिस्पर्धामा जान सबैसंग भोट मागी रहेका छन् । जादुमय आवाजका कारण सर्वप्रिय बनेका प्रशान्तलाई अब अत्याधिक भोटको खाँचो छ । त्यसैले उनले आहिले आम देशवासीमाझ आफुलाई भोट गरेर अगाडि बढाउन अनुरोध गरिरहेका छन् ।

यता बुधबारे जेसीजले पनि उनलाई जिताउन अभियान नै चलाएर जिताउन लागि पर्ने जनाएको छ । आज बुधबारेमा एक कार्यक्रमको आयोजना गरी उनलाई जिताउनका लागि बुधबारे जेसीज परिवार नै आगाडि बढि रहेको बुधबारे जेसीज बर्ष २०२५ का अध्यक्ष सुजित बरालले बताएका छन् ।

बुद्धशान्ति १ स्थित बालबाटिका मन्टेश्वरी विद्यालयको हलमा आयोजित कार्यक्रममा बुद्धशान्ति गाउँपालिका वडा नं २ की कार्यवाहक वडा अध्यक्ष सञ्जु पौडेल समाजसेवी चन्द्रप्रसाद कोइराला, जेसीजका पूर्वअध्यक्ष नन्दकुमार याफु लगायतले प्रशान्त बुद्धशान्तिको मात्रै नभएर एउटा झापाकै शान भएकाले उनलाई जिताउन सबैले भोट गर्न आग्रह गरेका छन् ।

फोटोसुट कार्यक्रमको पुरस्कार वितरण

सोही अवसरमा होली मिलन कार्यक्रमका बेला आयोजना गरेको फोटोसुट कार्यक्रमको पुरस्कार वितरण गरिएको छ । साथै बर्ष २०२५ को बार्षिक थिम सहितको टिसर्ट समेत वितरण गरेको छ ।

कार्यक्रमको संयोजन जेसी राज राज पौडेलले गरेका थिए । जेसीज आस्था पाठ जेसी सोमनाथ भट्टराईले गरेका थिए । कार्यक्रमको सञ्चालन बुधबारे जेसीजका महासचिव कृष्ण ढकालले गरेका थिए ।