झापा । झापाको भद्रपुरमा स्कुटर दुर्घटनामा परी एक जनाको ज्यान गएको छ । मृत्यु हुनेमा भद्रपुर नगरपालिका–२ गौरीशंकर निवासी ३५ वर्षीय अनिल लिम्बु रहेका छन् । जिल्ला प्रहरी कार्यालय झापाका अनुसार आइतबार राति पौने ९ बजे मेची राजमार्गअन्तर्गत चारआली–केचना सडक खण्डको झापा चोकदेखि दक्षिणतर्फको बाहुन गाउँमा स्कुटर अनियन्त्रित भई दुर्घटनामा परेको थियो ।
दुर्घटनामा परेका स्कुटर चालक दमक नगरपालिका–२ का २९ वर्षीय रबिन फुयल भने सकुशल रहेका छन् । स्कुटर पछाडि सवार लिम्बुको टाउकोमा गम्भीर चोट लागेकाले उनलाई तत्काल प्रादेशिक अस्पताल भद्रपुर लगिएको थियो । तर, उपचारको क्रममा उनको मृत्यु भएको प्रहरीले जनाएको छ ।
दुर्घटनामा स्कुटर सडक छेउको नालामा खसेको थियो । घटनाका बेला पानी परिरहेको र सडक अँध्यारो रहेको प्रहरीले जनाएको छ । स्कुटरको अगाडिको भाग क्षतिग्रस्त भएको छ ।
प्रहरीका अनुसार लिम्बु वैदेशिक रोजगारीका लागि म्यानपावर कम्पनी गएका थिए र फुयल उनलाई स्कुटरमा घर छोड्न आएका थिए । लिम्बुको ससुराली भद्रपुरमै रहेको बताइएको छ । अहिले वडा प्रहरी कार्यालय भद्रपुरले स्कुटर र चालक फुयललाई नियन्त्रणमा लिएको छ ।
