काठमाडौं । नेकपा एमालेका सांसद गोकुल बास्कोटाले धुलिखेलदेखि खावासम्मको चार किलोमिटर सडक निर्माण नहुँदा असन्तुष्टि व्यक्त गरेका छन्। प्रतिनिधि सभाको बैठकमा बोल्दै उनले चार पटक प्रधानमन्त्री परिवर्तन हुँदा र चार पटक मन्त्री फेरिँदा समेत उक्त सडक नबनेको प्रति भौतिक पूर्वाधार मन्त्रीको ध्यानाकर्षण गराए।
सांसद बास्कोटाले मन्त्री देवेन्द्र दाहाललाई जनताको गुनासो सुनाउँदै, अब पनि सडक नबने ढुंगा खानुपर्ने अवस्था आउने चेतावनी दिए। उनले भने, “खावादेखि धुलिखेलसम्मको ४ किलोमिटर सडक निर्माण अझै सम्पन्न भएको छैन। स्थानीय जनताले मन्त्रीको कानमा बतास पसोस् भन्ने माग गरेका छन्। यदि सडक नबने, अब ढुंगा खानुपर्ने स्थिति आउँछ।”
त्यसैगरी, काठमाडौंको तरकारी बजारमा १७ प्रतिशत योगदान गर्ने काभ्रेका किसानले ३ रुपैयाँमै काउली बेच्नुपर्ने बाध्यता रहेको भन्दै उनले कृषि मन्त्रीको ध्यानाकर्षण गराए। बनेपा, धुलिखेल, पाँचखाल, मण्डन र बेथानचोकका किसानलाई राहत दिन पाँचवटा कोल्ड स्टोर स्थापना गर्नुपर्ने उनको आग्रह थियो, ताकि किसानको लगानी सुरक्षित रहोस्।
