बुद्धशान्ति। झापाको बुद्धशान्ति गाउँपालिले गरिबी निवारणका लागी लघू उद्यम विकास कार्यक्रम अन्तर्गत पालिका भित्रका उद्यमीलाई लुगा सिलाउने मेसिन वितरण गरेको छ ।
गाउँपालिकाले सोमबार एक कार्यक्रमको आयोजना गरी बुद्धशान्ति गाउँपालिका वडा नं १ वडा नं २ साथै वडा नं ३ का विभीन्न समुहमा आबद्ध २८ जना महिलाहरूलाई सिलाई मेसिन वितरण गरेको हो ।
उद्योग स्थापना गर्न नसक्नेले पनि सिपलाई रोजगारसँग, रोजगारीलाई उत्पादनसंग र उत्पादनलाई बजारसँग जोडेर जिविकोपार्जन गर्न सकिने साथै आर्थिक उपार्जनका लागि सहयोग पुग्ने बताउँदै गाउँपालिका अध्यक्ष मनोज प्रसाईले स्वरोजगार बन्नका लागि गाउँपालिकाले प्रदान गरेको मेसिन सदुपयोग हुनेमा बिश्वास ब्यक्त गरेका थिए ।
यसअघि बाँढिएका विभिन्न प्रकारका प्रविधिको प्रयोग भइरहेको छ कि छैन भन्नेकुराको अनुगमन समेत गर्ने बताउँदै गाउँपालिका उपाध्यक्ष भवानी प्रसाद खतिवडाले गाँउपालिकाले उद्यमी बन्नका लागि सिपमुलक तालिम प्रदान गरेर प्रविधि हस्तान्तरण गर्दै आएको बताए ।
कार्यक्रममा बुद्धशान्ति गाउँपालिका योजना शाखा प्रमुख मदन कँडेल, वडा नं २ का वडा अध्यक्ष डिल्लि ओलि, वडा नं ३ का वडा अध्यक्ष पर्शुराम चेम्जोङ, कार्यपालिका सदस्य तिला परियार लगायतको उपस्थिति रहेको बुद्धशान्ति उद्यम विकास शाखा प्रमुख तारा अधिकारीले बताइन् ।
पालिकाले २८ जना उद्यमी महिलाहरूलाई सिलाई कटिङ मेसिन वितरण गरेको गाउँपालिकाले जनाएको छ । ७०र ३० प्रतिशत लागत साझेदारी कार्यक्रम अन्तर्गत पालिकाले सिलाई मेसिन वितरण गरिएको बताइएको छ ।
