कचनकवल – झापा कचनकवल गाउँपालिका–१ सोमबारे बजारकी ३३ वर्षीया गोमा भण्डारी अहिले दुग्ध संकलन केन्द्रको सम्पूर्ण जिम्मेवारी सम्हाल्दै परिवार र व्यवसायलाई अघि बढाइरहेकी छिन्।
करिब छ महिना अघि श्रीमान जीवन भण्डारी सडक दुर्घटनामा परी खुट्टा भाँचिएपछि बन्द हुने अवस्थामा पुगेको दुग्ध संकलन केन्द्रलाई गोमाले नै बचाइन्।
“श्रीमान दुर्घटनामा परेपछि दुई महिना कर्मचारी राखेर काम चलायौं, त्यसपछि आफैँ टेम्पु चलाएर दूध संकलन सुरु गरेँ,” उहाँले सम्झनुभयो।
बिहान सबेरैदेखि बेलुकीसम्म व्यस्त हुने गोमा बिहान ५ बजेदेखि १२ बजेसम्म र बेलुका ४ बजेदेखि ७ बजेसम्म टेम्पु लिएर डाँगीबारी, कुईमारी, आमबाडी, प्रगति टोल, बरालडाँडा, दुर्गाभिट्टा र खेरीबारीका बस्ती पुग्छिन्। दूध संकलन गरेर केन्द्र ल्याउने, मापन गर्ने, प्रशोधन गर्ने, ग्राहकलाई वितरण गर्ने र लेखा–जोखा राख्ने सबै जिम्मेवारी उहाँकै काँधमा छ।
“शुरुमा महिलाले यस्तो काम गर्न सक्लान् त भन्ने लाग्थ्यो,” गोमाले भन्नुभयो, “तर परिवार सम्झेपछि हिम्मत आयो र निरन्तरता दिन सकेँ।”
हाल उहाँ दैनिक करिब ५०० लिटर दूध संकलन गर्दै आइरहेकी छिन्। श्रीमान अस्वस्थ भएकाले देखरेखमा सीमित छन् भने ७१ वर्षीय ससुरा र ७० वर्षीया सासुले घर र नातिनातिनी सम्हाल्ने जिम्मा लिएका छन्।
गोमा भण्डारी कचनकवलकै पहिलो महिला हुन् जसले आफैँ टेम्पु चलाएर दूध संकलन गरिरहेकी छिन्। उहाँको साहस, परिश्रम र आत्मविश्वासले स्थानीय महिलाहरूलाई समेत प्रेरणा दिएको छ।
