झापा – झापाको कचनकवल गाउँपालिकाको टोली संघीय सरकारसमक्ष विभिन्न पूर्वाधार, पर्यटन प्रवर्द्धन, सिमसार संरक्षण, सडक तथा पुल निर्माण, शिक्षा, र खानेपानी आयोजनाहरू समावेश गर्न आग्रह गर्दै प्रस्तावसहित राजधानी पुगेको छ।
नेपालकै होचो भू-भाग रहेको कचनकवल गाउँपालिका कृषि, पर्यावरण, पर्यटन, र जैविक विविधताले भरिएको क्षेत्र भए तापनि बजेट अभावका कारण अपेक्षित विकास निर्माण अघि बढ्न नसकेको गाउँपालिकाले जनाएको छ। स्थानीय, प्रदेश, र संघीय सरकारबीच सहकार्य आवश्यक रहेको उल्लेख गर्दै, गाउँपालिकाले विभिन्न मन्त्रालय तथा सम्बन्धित निकायहरूसमक्ष औपचारिक प्रस्ताव लिएर गएको हो।
गाउँपालिकाले पर्यटन प्रवर्द्धनका लागि कचनकवल क्षेत्रको पर्यटन विकास, सिमसार संरक्षण, केचना पोखरी सिमसार क्षेत्रको संरक्षण, पुनःनिर्माण तथा स्तरोन्नति, भुतेश्वोर मन्दिरको जग्गा संरक्षण तथा घेराबार, चारकोशे जंगलमा लोपोन्मुख वनस्पति पहिचान तथा संरक्षण, दुर्गाभिट्टा सिमसार संरक्षण जस्ता योजनाहरू अघि सारेको छ।
भौतिक पूर्वाधारतर्फ मेची लोकमार्ग कालोपत्रे, सिंधीमारी–कुमालेवस्ती–बालुबाडी बजार सडक कालोपत्रे, अमलखुट्टा पुल निर्माण, जमुना खोला पुल निर्माण, पाठामारी–डुगडुगी–झिडखोला पुल निर्माण, पाठामारी–बनियानी अस्पताल जोड्ने सडक कालोपत्रे लगायतका योजनाहरू प्रस्ताव गरिएका छन्।
शिक्षा तथा सामाजिक पूर्वाधार अन्तर्गत जनता माध्यमिक विद्यालय भवन निर्माण, महेन्द्र रत्न माध्यमिक विद्यालय भवन निर्माण, द्रोणाचार्य महिला तथा बालबालिका भवन निर्माण, सहिद लक्ष्मी पाण्डे स्मृति प्रतिष्ठान भवन निर्माण लगायतका आयोजनाहरू प्रस्ताव गरिएका छन्।
खानेपानी तथा ऊर्जा विकासतर्फ पाठामारी खानेपानी तथा पाइपलाइन विस्तार, कृषि योग्य जमिनमा सिँचाइका लागि विद्युत् विस्तार लगायतका योजनाहरू समावेश गरिएका छन्।
कचनकवल गाउँपालिकाका प्रमुख तथा विभिन्न नेताहरू समृद्धि र विकासका योजनाहरू लिएर हाल काठमाडौंमा चैत १२ गते नै राजधानी पुगेका छन्। गाउँपालिका अध्यक्ष कालेन्द्र प्रसाद सिंह राजवंशी, उपाध्यक्ष नवराज भट्टराई, वडा अध्यक्ष चिन्तामणि खरेलसहित कोशी प्रदेश भौतिक योजना राज्यमन्त्री भूमि प्रसाद राजवंशी, पूर्व प्रदेशसभा सदस्य बसन्त कुमार बानियाँ तथा नेपाली कांग्रेस र नेकपा (एमाले) का अन्य नेताहरू राजधानीमा विभिन्न मन्त्रालयहरूमा योजना पेश गरिरहेका छन्।
गाउँपालिकाका उपाध्यक्ष नवराज भट्टराईका अनुसार, संघीय सरकारको सहकार्य विना स्थानीय तहले यस्ता योजनाहरू कार्यान्वयन गर्न कठिन छ। उनले स्थानीय सरकारका स्रोत सीमित भएकाले संघीय सरकारको सहयोग बिना महत्वपूर्ण पूर्वाधार परियोजनाहरू अघि बढाउन सम्भव नभएको बताए।
यसै सन्दर्भमा, कचनकवल गाउँपालिकाले संघीय सरकारका विभिन्न निकायहरूमा औपचारिक अनुरोध पठाएको छ। प्रतिनिधि सभा सदस्य अमृतलाल राजवंशी, सचेतक सुनिता बराल, सांसद के.आर. खुम्बु, शहरी विकास मन्त्री लगायत अन्य सम्बन्धित अधिकारीहरूसँग समन्वय गर्दै योजनाहरू संघीय बजेटमा समावेश गराउन पहल भइरहेको छ।
थप योजनाहरूमा बालुबाडी–हर्दसभिट्टा सडक कालोपत्रे, फुलबारी नयाँ बस्ती सडक कालोपत्रे, बनियानी कृषि उपज बजारको स्तरोन्नति, बनियानी क्षेत्रमा ढल व्यवस्थापन, द्रोणाचार्य रिङरोड सडक स्तरोन्नति लगायतका आयोजनाहरू रहेका छन्।
टोलीले प्रधानमन्त्री कार्यालय, विभिन्न मन्त्रालय तथा राष्ट्रिय योजना आयोगमा औपचारिक अनुरोध पत्र बुझाउने तयारी गरेको छ।
