काठमाडौं। वरिष्ठ संगीतकर्मी तथा हजारौं नेपाली संगीतकर्मीका गुरु गुरुदेव कामतको दुःखद निधन भएको छ । शास्त्रीय संगीतको माध्यमबाट राष्ट्रिय तथा अन्तर्राष्ट्रियस्तर रुपमा ख्यातिप्राप्त संगीतकार तथा गायक कामतको ६९ वर्षको उमेरमा बिहीवार बिहान निधन भएको हो । संयोग कस्तो जुरेको छ भने २०१२ साउन १७ गते सिरहाको पोखरभिण्डामा जन्मिएका संगीतकार गुरुदेव कामतको जन्मदिनकै दिन दुखद निधन भएको हो ।
काठमाडौंमा बसोबास गर्दै आएका कामत पछिल्लो समय आर्थिक समस्याका कारण यहाँ उपचार गराउन नसकेपछि एक महिनाअघि मात्र गाउँ फर्किएका थिए । शास्त्रीय संगीतमा निकै श्रद्धाका साथ नाम लिइने कामत पछिल्ला ४० वर्षदेखि निरन्तर काठमाडौंमा रहेर नेपाली गीत, संगीत, शास्त्रीय गायन क्षेत्रमा योगदान गर्दै आएका थिए ।
पछिल्लो समय उनलाई घरमा इायलासिस गराउँदै आइएको थियो । उनका कान्छा छोरा समीर कामतका अनुसार बिरामी भएर थलिएका कामतले चार दिनदेखि केही खानेकुरा खाएका थिएनन् । ६९ वर्षीय कामतको आजै अन्त्येष्टि गर्ने तयारी छ । कतारमा रहेका जेठा छोरा घर पुगेपछि आजै अन्त्येष्टि गरिने छ ।
शास्त्रीय गायक कामत नेपालमा जति प्रख्यात छन् भारतमा पनि उनको उत्तिकै प्रख्याति रहेको छ । उपचारमा रहँदामा डाक्टरले दुवै मृगौला प्रत्यारोपणका लागि जतिसक्दो चाँडो खर्च जुटाउन अनुरोध गरिरहेको थियो । करिब ३० लाख रुपैयाँ आवश्यक परेको परिवारले अनुरोध गरिरहँदा पनि आर्थिक संकलन हुन नसकेको हुँदा गुरुदेव कामत गाउँ फर्किनु परेको थियो ।
उनले संगीत शिक्षा दिएका विद्यार्थीहरु हजारौं छन् । दर्जनौं संगीतका संघ–संस्थाहरु भए पनि कामतको उपचारको सहयोग जुटाउन खासै पहल हुन सकेनन् । आर्थिक अभावकै कारण समयमा उपचार हुन नसक्दा यी दिग्गज संगीतकर्मी यो संसारबाट विदा हुनु परेको छ ।
