सय रुपैयाँ तिरेर दमक भ्यू टावर अवलोकन गर्न सकिने, भोलिदेखि सर्वसाधारणका लागि खुला

झापा। झापाको दमकमा निर्माण गरिएको १८ तले दमक भ्यू टावर (दमक व्यापारिक कम्प्लेक्स) भोलिदेखि सर्वसाधारणका लागि खुला गरिने भएको छ।

शहरी विकास तथा भवन निर्माण विभागअन्तर्गत सघन शहरी तथा भवन निर्माण आयोजनाले एक सूचना जारी गर्दै दमक नगरपालिका–३, दापगाछीस्थित भ्यू टावर सर्वसाधारणको लागि सशुल्क अवलोकन गर्न खुला गरिने जनाएको हो।

टावर परिसर प्रत्येक दिन बिहान १० बजेदेखि बेलुका ५ बजेसम्म खुला रहनेछ। अवलोकनका लागि प्रवेश शुल्क प्रतिव्यक्ति १ सय रुपैयाँ निर्धारण गरिएको छ। यस्तै, पार्किङ शुल्क हलुका सवारीका लागि २५ रुपैयाँ, बसका लागि ५० रुपैयाँ र मोटरसाइकलका लागि १० रुपैयाँ तोकिएको विभागले जनाएको छ।

दमकको उच्च स्थानमा अवस्थित यस भ्यू टावरबाट आसपासको दृश्यावलोकन गर्न सकिने बताइएको छ।