पालिका सन्देश । सीतारमेश बहुमुखी क्याम्पसमा सम्पन्न स्वतन्त्र विद्यार्थी युनियन (स्ववियु) निर्वाचन २०८१ मा अनेरास्ववियुका उम्मेदवार अशोक भण्डारी सभा पतिमा निर्वाचित भएका छन्। निर्वाचन उत्साहजनक र शान्तिपूर्ण वातावरणमा सम्पन्न भएको थियो। कुल ५२७ मतदाता मध्ये ४१८ जनाले आफ्नो मताधिकार प्रयोग गरेका थिए, जसअनुसार ७९.३२% मतदान भएको निर्वाचन समितिले जनाएको छ।
निर्वाचनको अन्तिम परिणामअनुसार सभापतिमा अशोक भण्डारी, सचिव र कोषाध्यक्षमामा नेविसंघका डम्बर कार्की र अभिषेक घतानी निर्वाचित भएका छन्। साथै, सदस्यहरूमा निर्मला आचार्य, कैलाश दाहाल, सौरभ गौतम, अनिता अर्याल र सौगात थापा विजयी भएका छन्।
निर्वाचन समितिका अनुसार मतदान प्रक्रिया निष्पक्ष, स्वतन्त्र र व्यवस्थित रूपमा सम्पन्न भयो। विद्यार्थीहरू आफ्नो मताधिकार प्रयोग गर्न अत्यन्तै उत्साहित देखिए। क्याम्पस प्रशासनले विद्यार्थी नेताहरूले लोकतान्त्रिक प्रक्रियालाई सम्मान गर्दै स्वस्थ प्रतिस्पर्धा देखाएको उल्लेख गर्यो। निर्वाचनका क्रममा कुनै अप्रिय घटना नघटेको र सम्पूर्ण प्रक्रिया निष्पक्ष रूपमा सम्पन्न भएको निर्वाचन अधिकृतले बताए।
नव-निर्वाचित सभापति अशोक भण्डारीले विद्यार्थीहरूको हकहित र शैक्षिक विकासका लागि प्रतिबद्ध भएर काम गर्ने प्रतिज्ञा गरे। उनले विद्यार्थीका समस्याहरू समाधान गर्न, उनीहरूको आवाज बुलन्द बनाउन र शिक्षाको गुणस्तर सुधार गर्न निरन्तर लागिरहने प्रतिवद्धता व्यक्त गरे।
नयाँ नेतृत्वले क्याम्पसका भौतिक पूर्वाधार सुधार, छात्रवृत्ति प्रणालीलाई प्रभावकारी बनाउने, विद्यार्थीहरूलाई अतिरिक्त गतिविधिमा संलग्न गराउने र शैक्षिक वातावरणलाई अझ गुणस्तरीय बनाउने योजना अघि बढाउने जनाएको छ।
