धनकौल/ सर्लाहीको धनकौल गाउँपालिकाका जनप्रतिनिधिले महिनाबारी हुँदा प्रयोग हुने सेनेटरी प्याडमा लाखौँ भ्रष्टाचार गरेका छन् । गाउँपालिकाका जनप्रतिनिधिहरुले सेनेटरी प्याड खरिदमा लाखौँ रुपैयाँ घोटाला गरेका हुन् ।
आर्थिक वर्ष २०८१/८२ मा धनकौल गाउँपालिकाले विद्यालयका अध्ययनरत छात्राहरुलाई वितरण गर्न किनिएको सेनेटरी प्याडमा लाखौँ भ्रष्टाचार भएको छ । गाउँपालिकाको शिक्षा शाखले खरिन गरेको सेनेटरी प्याडको खुद्रा बजार मूल्यभन्दा निकै बढी मूल्यमा थोकमा खरिद गरेको पाइएको हो ।
सेनेटरी प्याड पालिकाले खरिद गरेको समयमा प्रचलित बजारमा अधिकतम खुद्रा मूल्य प्रति प्याकेड ४५ रुपैयाँ भए पनि गाउँपालिकाले ७३ रुपैया ३२ पैसामा खरिद गरेको पाइएको छ । गाउँपालिकाले ११ हजार १७० सेनेटरी प्याड खरिद गरेको छ जसको मूल्य ८ लाख १८ हजार ९८४ रुपैयाँ तिरेको छ ।
वास्तविक बजार मूल्य ५ लाख २ हजार ६५० रुपैयाँ भन्दा गाउँपालिकाले सेनेटरी प्याड खरिदमा ३ लाख ५ हजार १६५ रुपैया भ्रष्टाचार गरेको देखिएको हो ।
महालेखा परीक्षकको वार्षिक प्रतिवेदनमा प्रचलित बजारमूल्यभन्दा निकै बढी रकम तिरेर गाउँपालिकाले सेनेटरी प्याड खरिद गरेको उल्लेख भएको छ । महालेखाले प्रतिवेदनमा गाउँपालिकाले अनियमितता गरेको ठहर गरेको छ ।
धनकौल गाउँपालिकाको शिक्षा शाखा प्रमुख फेरिएका छन् । वर्तमान शिक्षा शाखा प्रमुख अरुण प्रजापतिले गत आर्थिक वर्ष २०८०/८१ मा आफू शिक्षा शाखाको जिम्मेवार व्यक्ति नरहेकोले आफूलाई यस विषयमा केही पनि जानकारी नरहेको बताएका छन् ।
जनप्रतिनिधिहरुले सेनेटरी प्याडको रकममा पनि लाखौँ रुपैया खाएको कुराले गाउँपालिकामा निकै चर्चा पाएको छ ।
