झापा। नेपाल क्रिकेट संघ (क्यान) का अध्यक्ष चतुरबहादुर चन्द, उपाध्यक्ष रोशन सिंह रोयल र अन्य पदाधिकारीहरूको टोलीले कन्काई स्कुल र इलुवाबारी मैदानको भ्रमण गर्दै स्थानीय क्रिकेट प्रतिभालाई प्रोत्साहित गरेका छन्।
भ्रमणका क्रममा क्यान टोलीले युवा खेलाडीहरूसँग प्रत्यक्ष भेटघाट गरी उनीहरूको चुनौती र अवसरबारे छलफल गरेको थियो। अध्यक्ष चन्दले स्थानीय स्तरमा खेल मैदानहरूको स्तरोन्नति र खेलाडीहरूको विकासका लागि आवश्यक पहल गर्ने आश्वासन दिए। उपाध्यक्ष सिंहले क्षेत्रीय प्रतिभाको विकास नेपाली क्रिकेटको भविष्यका लागि महत्त्वपूर्ण रहेको बताए।
यस अवसरमा कार्यक्रम व्यवस्थापनमा सक्रिय भूमिका खेलेका स्थानीय खेलप्रेमी, अभिभावक र विशेषगरी राजेन्द्र उप्रेतीको योगदानको प्रशंसा गरिएको थियो। स्थानीय गुरुवर्गले यस्ता कार्यक्रमले युवालाई खेलमा सहभागी गराउन प्रेरित गर्ने विश्वास व्यक्त गरे।
सहभागीहरूले यस्ता भ्रमणलाई नियमित रूपमा गर्नुपर्ने माग राख्दै यसले ग्रामीण स्तरका खेलाडीहरूलाई राष्ट्रिय स्तरमा पुर्याउन सहयोग गर्ने उल्लेख गरे।
क्यान टोलीको यो भ्रमणले नेपाली क्रिकेटलाई बलियो बनाउने दिशामा थप ऊर्जा र उत्साह प्रदान गरेको छ।
