बिर्तामोड– झापाको बिर्तामोडस्थित एक्सप्रेश निहोन एकेडेमीले हालै सम्पन्न स्वतन्त्र विद्यार्थी युनियन (स्ववियु) निर्वाचनमा विजयी भएका कन्काई आदर्श क्याम्पस र इन्द्रचन्द्र क्याम्पसका विद्यार्थी प्रतिनिधिहरूलाई विशेष सम्मान गरेको छ।
एकेडेमीले आयोजित सम्मान कार्यक्रममा नव-निर्वाचित विद्यार्थी नेताहरूलाई सम्मानपत्र प्रदान गर्दै उनीहरूको नेतृत्व क्षमताको कदर गरिएको थियो। कार्यक्रमको सञ्चालन एकेडेमीका व्यवस्थापक मनिष दाहालले गरेका थिए।
सम्मान समारोहमा कन्काई आदर्श क्याम्पसका स्ववियु सभापति किरण गुरुङ र इन्द्रचन्द्र क्याम्पसका स्ववियु सभापति शृजित ढुङ्गानाले मन्तव्य राख्दै विद्यार्थी राजनीतिले युवाहरूको नेतृत्व क्षमता विकास गर्दै समाज हितमा काम गर्ने अवसर प्रदान गर्ने धारणा व्यक्त गरे। उनीहरूले विद्यार्थीहरूको अधिकार रक्षा र शिक्षाको गुणस्तर सुधारमा सक्रिय भूमिका खेल्ने प्रतिबद्धता जनाए।
कार्यक्रममा एक्सप्रेश निहोन एकेडेमीका प्रवन्ध निर्देशक प्रविण राउतले विद्यार्थीहरूको शैक्षिक तथा व्यावसायिक भविष्य निर्माणमा संस्थाले निरन्तर योगदान दिँदै आएको उल्लेख गरे। उनले जापानी भाषा अध्ययन गर्न चाहने विद्यार्थीहरूका लागि एकेडेमीले विशेष कक्षा सञ्चालन गरिरहेको जानकारी गराउँदै जापान जान चाहने विद्यार्थीहरूलाई भिसा प्रक्रियासम्बन्धी परामर्श र आवश्यक मार्गदर्शन उपलब्ध गराइने बताए।
उनका अनुसार, एकेडेमीले विद्यार्थी भिसासँगै कामदार भिसाका लागि आवश्यक परामर्श सेवा पनि प्रदान गरिरहेको छ। नेपालका युवा जनशक्तिलाई अन्तर्राष्ट्रिय स्तरमा प्रतिस्पर्धी बनाउन जापानी भाषा तथा संस्कृतिको अध्ययन महत्त्वपूर्ण हुने उनले बताए।
कार्यक्रममा विभिन्न शैक्षिक संस्थाका प्रतिनिधिहरू, विद्यार्थी नेता, शिक्षकहरू तथा विद्यार्थीहरूको उल्लेखनीय उपस्थिति रहेको थियो। एक्सप्रेश निहोन एकेडेमीले भविष्यमा पनि विद्यार्थीहरूलाई उच्च शिक्षाका अवसर प्रदान गर्दै अन्तर्राष्ट्रिय स्तरमा प्रतिस्पर्धी बनाउन आवश्यक ज्ञान तथा सीप विकास गराउने प्रतिबद्धता व्यक्त गरेको छ।
