सङ्क्रमणकालीन न्याय निरूपणको माग गर्दै संसद भवन अघि विरोध प्रदर्शन गरेका मानव अधिकार तथा शान्ति समाजका करिब डेढ दर्जन अधिकारकर्मीहरू पक्राउ परेका छन् ।
आइतबार संसद भवन अघि निषेधित क्षेत्रमा विरोध प्रदर्शन गर्दा प्रहरीले उनीहरूलाई हस्तक्षेप गरेको हो ।
उनीहरूले ‘हत्यारालाई आममाफी, नागरिकमा रुवाबासी’, ‘फागुन १ गते जनयुद्ध दिवसका नाममा बिदा दिने निर्णय खारेज गर’ जस्ता नारा लगाएर विरोध प्रदर्शन गरेका थिए ।
पक्राउ पर्नेहरूमा समाजका संस्थापक अध्यक्ष कृष्ण पहाडी, पूर्वअध्यक्ष उत्तम पुडासैनी, वर्तमान केन्द्रीय अध्यक्ष रामकृष्ण बरालसहित करिब डेढ दर्जन रहेका छन्।
सरकारले ‘जनयुद्ध दिवस’को अवसरमा फागुन १ गते दिएको सार्वजनिक बिदा खारेजीसँगै विस्तृत शान्ति सम्झौताको मर्मअनुरूप पीडितलाई न्याय र पीडकलाई सजाय सुनिश्चित गर्न, सङ्क्रमणकालीन न्याय प्रक्रियासम्बन्धी संसदमा प्रस्तुत संशोधन विधेयक मानव अधिकारमैत्री बनाउनुपर्ने लगायतका माग राख्दै प्रदर्शन गरेका हुन्
