झापा। हल्दिबारी गाउँपालिका वडा नम्बर ५ स्थित सोडागान्धि चोकमा भएको सवारी दुर्घटनामा दुईजनाको मृत्यु भएको छ। दुर्घटनामा हल्दिबारी गाउँपालिका-५ कन्चनश्री निवासी ३० वर्षीय प्रेम प्रसाद प्रसाईं र मेचीनगर नगरपालिका-६ निवासी २५ वर्षीय बिकेश कार्कीको ज्यान गएको हो।
राजगढबाट जलथलतर्फ गइरहेको मे १ ज ३२६१ नम्बरको पिकअप गाडीले जलथलबाट राजगढतर्फ जाँदै गरेको मे ९ प ९६८५ नम्बरको मोटरसाइकललाई ठक्कर दिएको थियो। दुर्घटनामा गम्भीर घाइते भएका मोटरसाइकल चालक प्रेम प्रसाद प्रसाईं र सवार बिकेश कार्कीलाई उपचारका लागि बिर्तामोड स्थित बी एण्ड सी अस्पताल पुर्याइएको थियो। चिकित्सकले उपचारको क्रममा राति ८ बजे दुबैजनालाई मृत घोषित गरेका छन्।
पिकअप चालक, झापा भद्रपुर नगरपालिका वडा नम्बर २ निवासी ३७ वर्षीय दिपेन राईलाई जिल्ला प्रहरी कार्यालय झापाले नियन्त्रणमा लिएको छ। प्रहरीले सो सम्बन्धमा थप अनुसन्धान जारी रहेको जानकारी दिएको छ।
