काठमाडौँ – राष्ट्रिय स्वतन्त्र पार्टी (रास्वपा)ले आगामी कार्तिक १७ गते हुने उपनिर्वाचनका लागि रुपन्देही–३ मा डा. लेखजंग थापालाई उम्मेदवार बनाउने निर्णय गरेको छ ।
उम्मेदवारका ९ जना आकांक्षीहरुलाई विभिन्न विधिमार्फत प्रतिस्पर्धा गराई अन्ततः डा. थापालाई उम्मेदवारका रुपमा छनोट गरिएको कार्यवाहक सभापति डीपी अर्यालले बताए । । रास्वपाबाट उपनिर्वाचनमा उम्मेदवार बन्न आवेदन दिएकामध्ये पार्थिवेन्द्र उपाध्याय, उमा अधिकारी, सुलभ खरेल, डा. लेखजंग थापा, ज्ञानु पौड्याल, जितबहादुर गुप्ता (जेबी), कुसुम महर्जन, रचना क्षेत्री र मधु अर्याल ९ जना प्रारम्भिक सूचीमा थिए ।
जसमध्ये उम्मेदवार छनोट गर्न साउन ५ गतेदेखि प्रारम्भिक निर्वाचन, अन्तरवार्ता, प्रस्तुती लगायतका प्रक्रियाहरु अपनाइएको थियो । उम्मेदवार सार्वजनिक कार्यक्रममा रास्वपाका प्रवक्ता मनिष झाले रास्वपाको उम्मेदवार छनोट प्रक्रिया नेपाली राजनीतिमा नयाँ आयामका रुपमा स्थापित भएको बताए ।
२०७९ को निर्वाचनमा राष्ट्रिय प्रजातन्त्र पार्टी (राप्रपा) का तर्फबाट निर्वाचित सांसद दीपक बोहराको निधन भएपछि उक्त क्षेत्र रिक्त छ।प्रतिनिधि सभा सदस्य चयनका लागि आगामी कात्तिक १७ गते रुपन्देही निर्वाचन क्षेत्र नं. ३ मा उपनिर्वाचन हुँदै छ।
उक्त निर्वाचनमा रास्वपाको चुनाव चिह्न लिएर डा. थापा मैदानमा उत्रिने भएका छन् । थापा वरिष्ठ न्युरोलोजिष्ट, अभियन्ता र सामाजिक व्यक्तित्व हुन् ।
