झापा जिल्लाको बुद्धशान्ति गाउँपालिका–४ बर्नेस्थित सडक छेउमा ढकमक्क फुलेका गुलमोहरले दैनिक हजारौँ पर्यटकलाई आकर्षित गर्दै आएको छ। चिया बगानको हरियालीबीच राताम्य गुलमोहर फुल्दा यात्रुहरू मोहित हुने गरेका छन्। पालिकाले गत वर्ष यहाँ खानेपानी, शौचालय, चौतारो र ब्लकसहितको सडक विस्तारको व्यवस्था गरेसँगै ‘टिकटक रोड’को रूपमा परिचित भएको छ। इलामतर्फ गइरहेका घुमन्तेहरू र नजिकैको झोलुङ्गे पुल हेर्न आउनेहरू यस स्थानमा अवश्य रोकिने गर्छन्।