- रुद्र उप्रेती
कचनकवल। झापाको कचनकवल गाउँपालिका-७ अन्तर्गत सहिद चन्द्रमणि प्रतिष्ठान जोड्ने सडक निर्माण अलपत्र परेपछि स्थानीय बासिन्दा सास्ती भोग्न बाध्य भएका छन्। गाउँपालिकाबाट विनियोजित बजेटबाट फर्साडागी क्षेत्रमा कालोपत्रे सडक निर्माण गरिने भनिए पनि हालसम्म दुबै छेउमा माटो हाल्ने कामबाहेक अन्य कुनै प्रगति भएको छैन।
लामो समयदेखि निर्माण कार्य रोकिँदा सडकमा धुलो उड्ने समस्या देखिएको छ, जसले आवागमनमा कठिनाइ उत्पन्न गरेको छ र स्थानीय बासिन्दाको स्वास्थ्यमा समेत नकारात्मक असर परेको छ। स्थानीय श्याम घिमिरे, श्याम साह, रूपेन्द्र राजबंशी लगायतले समयमै काम सम्पन्न नहुँदा दैनिक जीवन कष्टकर बनेको गुनासो गरेका छन्। धुलोका कारण सवारी सञ्चालनमा समस्या हुनुका साथै स्वास्थ्यमा समेत गम्भीर असर परिरहेको उनीहरू बताउँछन्।
सडक निर्माणको जिम्मा लिएको अछुत कन्स्ट्रक्सन कम्पनीका सञ्चालक मित्र सापकोटाले तोकिएको समयमा काम सम्पन्न गर्न नसक्दा स्थानीय थप समस्यामा परेका छन्। सम्बन्धित निकायले चासो नदेखाउँदा निर्माण कहिले पूरा हुन्छ भन्ने अन्योल बढेको छ।
स्थानीयले सम्बन्धित निकायलाई छिटो कदम चाल्न र निर्माण कार्य तत्काल सम्पन्न गराउन आग्रह गरेका छन्। चैतसम्ममा काम सम्पन्न गर्ने योजना भए पनि फागुन सकिन लाग्दा समेत माटो हाल्ने बाहेक अन्य काम अघि नबढेको स्थानीय बासिन्दाहरूले गुनासो गरेका छन्।
