झापा — अन्तर्राष्ट्रिय प्रेस स्वतन्त्रता दिवसको अवसरमा नेपाल पत्रकार महासंघ झापा शाखाले आयोजना गरेको ‘प्रेस स्वतन्त्रताका लागि राजनीतिक दलको प्रतिबद्धता’ विषयक अन्तरसंवाद कार्यक्रम एकाएक तनावपूर्ण बनेको छ।
कार्यक्रममा जनमत पार्टी झापा जिल्ला अध्यक्ष भोटुलाल राजवंशीले पत्रकारलाई लक्षित गर्दै “झोले” भन्ने दूर्व्यवहारपूर्ण शब्द प्रयोग गरेपछि विवाद उत्पन्न भएको हो। राजवंशीले मन्तव्य राख्ने क्रममा झापाका केही पत्रकारहरू ठूला दलको झोला बोकेर जनमत पार्टीका गतिविधिहरूको बहिष्कार गरिरहेको आरोप समेत लगाए।
उनले बारम्बार “झोले” शब्द दोहोर्याएपछि उपस्थित पत्रकारहरू आक्रोशित भए। स्थिति यति चर्कियो कि पत्रकार राजेन्द्र गौतम र लक्ष्मी उप्रेतीले उनलाई पोडियमबाट हटाएर मञ्चमै फर्काइदिए।
“शालीन रूपमा अभिव्यक्ति दिन दिइएको थियो, तर उहाँले उल्टै पत्रकारमाथि लान्छना लगाउन थालेपछि बोल्न नदिइएको हो,” पत्रकार गौतमले प्रतिक्रिया दिए।
